一个讲上海闲话要罚款个商厦 / 开普饭

沪语朗读：余晖

朗读者

一个讲上海闲话要罚款个商厦

作者、朗读：余晖

推荐：丁迪蒙

勒拉上世纪八十年代末，中央电视台新闻联播常庄勒黄金时段，播出一段广告语，我想五十岁以上个人侪会得回忆得起来，“中原之行，哪里去？郑州亚细亚。”可想象搿个辰光个郑州亚细亚勒拉中原搭仔全国个百货行业里向是大名鼎鼎个。大有赶超北京个王府井，上海个市百一店、华联商厦个腔势。伊拉打出了“变革中国商业”个旗帜。进入上世纪九十年代以店，陆续勒拉河南省里向到处开店拓展，譬方讲南阳、漯河咾煞，到了一九九五年，更加是延伸到了北京、上海、广州，当年有三家仠村百货几乎是同时开业，迭个令业内人士无侪觉着老结棍个。必过，又侪垃勒拉勿到两年辰光里向，相继破产倒闭。亚细亚商业帝国之梦轰然倒塌，接下来就是狼烟四起呀！亚细亚集团旗下个上海仠村百货在不到一年个辰光，就拨坏账搭讨债个官司拖垮破产了。

最搞笑个是，亚细亚高层推行个所谓企业文化，其中有一条，就是勿允许上海人讲上海闲话，伊拉有专门个执法队，去捉讲上海闲话个上海人经理及职工，捉到呢就要开罚单，一张罚单一百块噢，我当时是个部门经理，也拨罚过一趟。伊拉还编写了晨会誓词，大概内容是：讲普通话光荣咾啥。意思是讲上海闲话就是可耻个，伊拉规定：职工勒营业、销售个过程当中，只能讲普通话。

记得当初执法队个队长是一个勿会笑个郑州女人，还有一个是长得勿错个郑州男青年，平时伊也勿笑个。

搿个辰光，我一家头想抵制是没用个，因为搿是上级部门默认，职工拨强制认同个所谓个企业文化。

现在想来真是可悲、可叹又可笑个事体。侬想想看，我伲上海人讲上海闲话，还要拨罚款，搿个事实浪向是比上世纪初黄浦公园门口个搿块“华人与狗，不得入内”个牌子还要戳心戳肺啊！搿个勿禁让我伲想起清军入关，强迫我伲汉族人蓄发留辫子一样，是对人格个侮辱。我想，外国人也没歧视我伲讲上海闲话，勒上世纪初还有交关外国人神父编写英文与沪语个对照字典唻！每当我看到搿些旧个字典，真是无比个羞愧。所以讲，勿要老是讲伲上海人末排外咾啥，看勿起外地人，事实浪向伊拉当中某些人一旦春风得意个辰光，还是蛮作个。

今朝，我伲觉着，推广沪语首先对海派文化要充满自信，相关教育部门勿应该坐视勿管，更加勿应该打压沪语个推广与传承，搿个再是根本，决勿能让搿种闹剧搭仔要笑脱下巴个事体再次重现了。