故里春秋（四）
作者：朱海洪
沪语改写：边秦翌
沪语讲述：赵群社
小尼姑个爷娘是女居士个远房亲眷。出于同情，女居士拿孤苦无依个小姑娘接到了上海。可惜个是，好景勿长，呒没几年功夫，女居士生重毛病，一病勿起了。临终之前，女居士想办法拿小姑娘托付拨了尼姑庵。
新昌路一带，只有酱园弄旁边有得一只寺庙。我小辰光曾经跟牢仔大人到庙里向去做佛事，跪勒蒲团浪向磕过头，走个辰光人家还送了黄粉金团拨我吃。搿歇想起来，迭个寺庙应该就是小姑娘栖身个尼姑庵。
小姑娘变成了小尼姑，勒勒庵堂里向打发时光，呒没想到无意之中带走了一个人个心。迭个人是啥人呢？讲得浪漫点，就是小尼姑心里向个人。
我勿晓得小尼姑个心上人个名字，但是我看到过伊个，一个长长、瘦瘦、白白个、长得蛮清爽个小青年。迭个小青年是女居士个邻居，住勒女居士对门个，当中隔了一只天井过道，天井过道有扇门，出门就到弄堂口了。每日天进进出出，小青年搭仔小姑娘抬头勿见低头见，从两小无猜到日久生情。
我呒没看到过光头个小尼姑，但是我看到过伊还俗之后卷头发个样子，是一个皮肤雪雪白、面孔长得老漂亮个女青年，恬静当中透出来个、最是那一低头个温柔。小青年勿动心再是勿正常个。
小姑娘进了尼姑庵，男青年邪气郁闷：“佛门一入深如海，从此萧郎是路人”。男青年个遭遇有眼象崔秀才了。
崔秀才么，就是唐代诗人崔郊呀。勒元和年间，崔郊寄居伊个嬢嬢屋里，搭一个才貌双全个婢女，勒勒谈论音乐当中跌进了爱河。呒没想到个是，嬢嬢屋里家道中落了，为了要好好叫活下去，就拿迭个婢女卖拨了一个大官，换来了四千钱，相当于四两银子伐。大官叫于頔，看到婢女长得邪气好看，就宝贝得勿得了，对伊是邪气个宠爱呀。于頔倒是蛮开心个，乃末搿个崔郊是心痛啊。崔郊勿甘心，想尽办法打听到了，勒勒寒食节搿日天，大官可能会得带婢女一道出来个，伊就勒伊拉个必经之路个一棵柳树下头等勒海。车队真个来了，崔郊呆瞪瞪个看牢仔车队从伊眼门前过去，伊勿敢上去打招呼，只好迓勒角落头里落眼泪。痛心之余，伊提笔写了一首《赠婢》诗：
公子王孙逐后尘，绿珠垂泪滴罗巾。
侯门一入深如海，从此萧郎是路人。
有得一个嫉妒崔郊才学个小人，拿诗抄送拨勒于頔：“于大人，有人牵记侬个女人，侬要防勒海个噢！”
乃末于頔就派人拿崔郊叫过来，问伊：“侯门一入深如海”是侬写个伐？崔郊讲：“是个。”“侬是写拨伊个？”崔郊心里想：我是老早就欢喜伊，搭伊要好个，又勿是你讨了伊之后我再勾搭个，怕点啥？所以就回答：“是个”。
于頔讲：“四千铜钿嘛，必过是眼小铜钿，何必要偷偷叫写诗，让眼小人抄得来拨我看！来人，拿夫人所有个首饰侪拿过来，放伊跟牢崔生走伐！”
崔郊一记头呆脱了：“我勿是勒勒做梦伐！天底之下真个有人肯拿自家个女人让出来个啊？”
崔郊勿仅抱得了美人归，还留下了一联千古名句。
男青年比崔秀才倒霉得多。勿管哪能，侯门终究还勒俗世个，佛门真个是跳出勒红尘了呀。但是伊同样勿甘心，经常有事体呒没事体就到尼姑庵里向去兜一圈。伊假装是勒拜佛，眼角里却是东张张、西望望，看勿到小尼姑个身影，又勿好意思去问，只好灰溜溜个回转来。但是，伊照样是痴心勿改，一有得空就朝伊面跑，难板也有得碰着个辰光，但是又勿方便讲闲话，只好用眉目传情。作兴是伊个痴心让老天爷也感动了：居然有一天，尼姑庵倒闭脱了噢。
葛末，尼姑庵哪能会得倒闭个呢？
原来啊，人民政府破除迷信，宗教庙宇统统关门大吉。寺庙个门一关末，僧侣就侪失业了呀；必过对搿对有情人来讲，倒是一桩老好个事体呶，小尼姑还俗回到红尘，开开心心个回到了男青年个身边。
小尼姑还俗了，关帝庙就变成功“广泰”了。
朗读者
往期回顾：
图：网络 / 编辑：渺渺