剖视上海人个尴尬（四）
沪语朗读：沉默是金
作者：余秋雨
沪语改写：丁迪蒙
上海文明个另一心理品性，是发端于国际交往历史个开放型文化追求。
相比之下，勒全国范围之内，上海人面对国际社会个心理状态比较平衡。伊拉从来没勒内心鄙视过外国人，因此也勿会吓外国人，或者去表示超乎常态个恭敬。伊拉勒总体浪有点崇洋，但勒气质浪却勿大会媚外。我个朋友沙叶新曾经幽默个提出过伊个人生态度之一是“崇洋不媚外”，借过来概括上海人个心态也是搿能个。
毫无疑问，搿搭搿座城市个历史密切有关。老一代人力车夫侪会说两句英文，即使收入邪气低微，伊拉也敢于勒“五卅”风潮当中搭外国人争一个高低。
上海个弄堂里一直有勿少外国侨民住勒海，长年个邻居，关系也就调节得十分自然。上海商店个营业员勿会拿个外国顾客忒当桩事体，常常还会估量外国顾客个经济实力，帮伊出点购物个主意。
勒上海人个口语当中，除脱小囡，拿外国人统称为“外国人”个邪气少，只要晓得国籍，就会具体讲美国人、英国人、德国人、日本人。搿说明，就是一般个市民，搭外国人也有一种心理趋近。
今朝，勿管是阿里个阶层，上海人个子女第一企盼个是出国留学。到日本去边读书、边打工，是已经走投无路了个小青年自家个选择。只要子女还没成年，家长是勿作搿种选择个，伊拉希望子女可以正正经经到美国去留学。搿搭勒普及个是一种国际世野。
其实，即使是勒呒没开放个时代，上海人勒对子女个教育浪也隐隐埋伏勒海一种国际性个文化要求，勿管当时是否能实现。
上海个中学对英语是一直比较重视个，即使当时几乎呒没用，也没家长提出要免修。上海人总归要求小囡勒课余学点钢琴或者唱歌，但又并勿希望伊拉拨吸收到当时邪气有吸引力个部队文工团。一度勒全国口碑老好个哈尔滨军事工业大学，历来对上海个优秀生构勿成向往。
勒“文革”动乱当中，好像一切侪灭绝了，但是有几次外国古典音乐代表团悄悄叫到上海来，报纸浪也呒没作啥个宣传，勿晓得哪能马上会得卷起抢购票子个热潮，介许多外国音乐迷原来侪躲到啥地方去了呢？开演个辰光，伊拉衣裳整洁，秩序搭仔礼节全部符合国际惯例，邪气为上海人争气个。
前两年，我所在个学院试演著名荒诞派戏剧《等待戈多》，按照一般标准，搿只戏看起来枯燥乏味，国外有勿少城市演出个辰光观众也勿多。但是上海个观众却可以静静叫看光，勿骂人，勿议论，也勿欢呼，当中肯定有勿少人是完全看勿懂个，但伊拉晓得搿是一部世界名作，应该看一看，自家看勿懂也邪气自然，勿恨戏也勿恨自家。一夜又一夜，搿批去了伊批来，平静而安祥。
用勿着遮遮掩掩，上海个下层社会并勿具备国际性个文化追求，但长期置身勒搿能一个城市里，久而久之，至少也养成了对一般文化个景仰。
上海也流行过“读书无用论”，但情况搭外地略有勿同，绝大多数家长侪勿能容忍一个可以读上去个小囡放弃学习，只有对实在读勿好个子女，再用“读书无用论”来作为借口聊以自慰，并搭邻居搪塞一下。
即使勒“文革”动乱当中，“文革”前最后一批大学毕业生始终是视点集中个求婚对象，哪怕伊拉当时薪水邪气低，前途无望，或者外貌欠佳。勒特定个历史条件搭仔社会环境当中，搿种对文化个景仰带有非实利个盲目性，最讲实利个上海人勒搿一点浪向勿讲实利，搿是上海人搭广州人个最大区别之一。尽管伊拉勒其他勿少方面邪气接近个。
上海文明个心理特征还可以举出一些来，但从搿几点已经可以看出一点大概来了。
有趣个是，上海文明个承受者是一个构成极为复杂个群体，因此，搿种文明并勿体现为一个规定死脱了个群体，而是呈现为一种无形个心理秩序，吸纳搭仔放逐勒来来去去个过往人丁。有个人，居住勒上海交关辰光了还没能皈依搿种文明，相反，有个人进去勿久便神魂与共。搿就产生了非户籍意义上，而是心理文化意义个上海人。
毫无疑问，上海人远勿是理想个现代城市人。一部扭曲个历史限制了伊拉，也塑造了伊拉；一个特殊个方位释放了伊拉，又制约了伊拉。伊拉勒全国显得邪气奇特，勒世界浪也显得有点怪异。
勒文化人结构浪，伊拉是缺少皈依个一群。靠传统？靠新潮？靠内陆？靠国际？靠经济？靠文化？靠美誉？靠人情？靠效率？伊拉个靠山像煞蛮多，但每一座侪有点依稀朦胧。伊拉最容易洒脱出去，但又常常觉着一种洒脱个孤独。
伊拉做过个，或者能够做个梦侪忒多忒多。带勒满脑子个梦想，拖勒跌跌冲冲个脚步。好像有无数个声音勒呼唤伊拉，伊拉个才干也勒浑身冲动，于是，伊拉就陷入了真正个惶惑。伊拉也感觉到了自身个陋习，憬悟到了自家个没用，却勿晓得挽啥个风，捧啥个水，去拿自家洗涤。
每日天老清老早，上海人还勒市场浪讨价还价，还勒邪气轧个公交车浪吵相骂。夜里向回到屋里，静静心，教训小囡拿英文学好。小囡毕业了，出息勿大，上海人叹息一声，抚摸抚摸斑白个头发。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号