戒尺打手心啥味道陈飞
作者：申涛
文字修正：丁迪蒙
老底子，老师可以用戒尺打学生仔个手心。我搿个辰光勒勒石库门弄堂里个私立小学读书，每趟上课，老师就拿戒尺摆勒讲台浪，好像县太爷个惊堂木，起一种威慑作用。有辰光，老师要用戒尺打人，勿巧忘记脱带来，乃末就顺手从墙脚根捞起根课桌个脚当戒尺，弄勿好上头还有洋钉,老吓人个。
拨老师吃生活个常庄是眼勿听闲话或者是功课呒没做好个同学，还有就是老师看勿惯，长得难看，犟头倔脑个。记得有个同学脾气犟，常庄拨老师拖到讲台前头用戒尺浑身上下乱打八打，就是勿讨饶，勿服输。搿能一来末，老师个脾气就上来了呀,只看见戒尺飞舞、手臂，大腿，屁股，头浪,反正是敲到阿里算阿里，打得搿个同学勒勒地浪向打滚，阿拉搿班小活狲侪吓得刮刮抖呀。
顶顶可恶个，是学堂里个宁波校长,居然也来上公民课。伊屁也勿懂，拖来一把椅子,拿了本书，堂而皇之坐勒讲台前头，叫学生仔上来背书。伊自家看好课本对照。学生漏背一个字，伊嘴巴里就数1，最后统计，漏背36个字，就打学生36记手心，嘴巴里还要骂句“娘西匹”，搿也好算是上课个。
搿辰光个老师，拿戒尺摆勒讲台浪，主要还是做做规矩，吓吓学生仔，倒勿是每堂课板要打学生个。不过，有趟测验，全班学生统统勿及格，乃末老师发格了，“大屠杀”了。所谓“大屠杀”，就是从第一排第一个打起，打到勒末一个，正好下课，一个勿漏。女生看老师要开杀戒，就一道哇啦哇啦哭；男生呢，朝手心里吐馋吐水，拼命个搓手心，硬撑。照现在个讲法，就是做热身运动。有个同学还临时抱佛脚，偷偷叫交流经验，讲下趟到马路浪去拾点马屙，再和点麻油，搨勒手心浪，搿能一来末，戒尺打上去就只听见声音辟啪穷响，一也勿痛个。
全班刚好勒乱哄哄个辰光，突然“啪”一声，老师拿仔戒尺，从第一排开打，人人吃三记手心。要是侬看到戒尺落下来，吓得手一缩，打空脱了末，老师个火气就上来了，板定要多吃记手心。要是再调皮，老师就狠命个拿侬个手背揿勒台角浪，手心朝上一记头敲下去，手心辣豁豁倒熬得过去，顶要命个是手背，钻心个痛呀！痛得心也会抖豁个！搿个辰光，我大概长得讨人喜欢，挨到我吃戒尺，老师拿戒尺举得老老高，轻轻叫落下来，一点也呒没感觉。哈哈，要是现在再碰着迭个老师，我保证搭伊讲：“老师，麻烦侬再打两记！”
弄堂小学，属于螺蛳壳里做道场，上体育课只好勒弄堂里向排队。排得勿整齐，体育老师就会撩起戒尺挨一挨二头顶心“笃笃笃”敲过去，像煞是老和尚拿小和尚个枯榔头当木鱼敲，伸头一记，缩头也是一记。
老早老师用戒尺打学生，做规矩勿错，不过有辰光也忒过分了。现在呢，勿许老师训诫学生，也是勿对个。《三字经》讲，“教不严，师之惰。”应该反思个。
朗读者
往期回顾：
图：网络 / 编辑：渺渺