难忘当年上“三班”
沪语朗读：冯济民
朗读者
难忘当年上“三班”
作者：冯济民
朗读：冯济民
推荐：丁迪蒙
所谓“三班”就是早班、中班、夜班。当年我做码头装卸工个辰光就是上个“三班”，搿比起早出夜归个“常日班”来，更加辛苦更加吃力。
“三班”分为“小三班”和“大三班”。所谓“小三班”，就是八个钟头一工班，一天工作八个钟头，休息16个钟头。所谓“大三班”呢，就是工作12个钟头，休息24个钟头。
我当时辰光上个是“小三班”。
"小三班”个翻班又分为“小翻班”和“大翻班”。所谓“小翻班”就是早班翻中班或者夜班翻早班。当中隔了24个钟头。所谓“大翻班”呢，就是早班翻夜班或者夜班翻中班。当中隔了32个钟头。
我当时上个“三班”是四天早班，两天夜班，然后再是四天中班两天夜班。一年到头就是搿能样子翻班。刚开始上“三班”还是蛮开心个，日里向有得交关空余个辰光。特别是碰到“大翻班”，休息个辰光就更加多了。当时年少气盛精神好，也勿要睏多少觉。即使是上夜班，也只要下半日睏个两三个钟头就可以了。但是后来辰光一长，就觉着辛苦了。
上“三班”，人个生物钟完全拨打乱脱了，日里睏觉，夜里工作。人常庄讲:“多吃半夜饭，少吃年夜饭”。就是讲，搿种日夜颠倒个生活是要折寿个。码头装卸工做个又是特重个体力生活。勿管是早班、中班还是夜班，上班八个钟头侪是要实打实做个。八个钟头做下来简直就是筋疲力尽，回到屋里向倒头就睏。特别是夜班，一夜勿睏还要做重体力生活个辛苦和劳累，真是一言难尽。下班回到屋里吃眼饭就一直睏到夜里再爬起来上夜班，连得中饭也勿吃了。搿真像人常常讲个“一夜勿睏，十夜勿醒”。上早班也是邪气辛苦个。早班是6点钟上班。屋里4点半就要碌起来，5点半之前一定要赶到单位个，因为5点半要开工班会，安排当天个工作。6点就要到码头现场开工了。勿管是炎夏，寒冬，还是刮风落雨一年到头侪是搿能。冷天介个早浪向，4点多钟还是黑咕隆咚个，闹钟一响马上爬起来，用最快个速度穿衣裳、洗漱、吃早饭，踏脚踏车赶到单位。然后呢，又要拿衣裳从里到外全部换脱。勒呒没暖气个工棚里脱下来刚刚着好个衣裳，换上冰冰冷个工作衣，冻得来是浑身发抖、起鸡皮疙瘩个。所以人家侪讲，装卸工个衣裳勿是着坏脱个，是脱坏个，真是一眼勿假。
当时辰光，每日天个政治学习是雷打勿动个。上早班是下班以后学习。中班搭仔夜班个学习是上班之前。中班讲是下半日2点钟上班，实际浪中浪12点钟就要赶到单位里去参加政治学习了，11点半前必须出门。夜班讲是夜里10点上班，但是实际浪8点钟就要到单位里去学习，7点半前必须出门个。所以，当时我每日天除脱上班就是睏觉，一天到夜睏勿醒。只有碰到“大翻班”再稍微轻松点，睏醒了还好出去白相相，散散心。
从1972年1月到码头工作，一直到1976年6月拨港务局政宣组借调到上海人民出版社参加编写港史，我做了四年半个装卸工，也上了四年半个“三班”。我深深感到装卸工个劳累，也更加晓得上“三班”个辛苦。后来上“常日班”，坐办公室，我一直感到搿个简直就是享福了。搿种体会，呒没上过“三班”个人是决勿会有个！
退休以后，每日天早浪向侪可以睏到自然醒。特别是冬天睏辣暖热个被头筒里一直要到八、九点钟再起来。我常常会想起当年早浪摸黑起床、换好冰冷个工作服去上早班个情景。夜里辣屋里坐辣沙发浪写写意意个看电视个辰光，我也会得想起当年夜里出门上夜班个情景。我深深个感到，阿拉搿一代吃过了勿少个苦，现在个生活真个是老幸福个呀！
往期回顾：
图片来自网络