蛙鼓拈花湾
沪语朗读：郭健
作者：吴翼民
沪语改写：丁迪蒙
交关人家侪朝无锡拈花湾奔，去看日式小镇风情：热闹个市井、恬静个民宿、夜里向锃亮个灯光、春天像云霞一样个樱花……
我，却是发现了，迭个太湖边头个小镇里向最有味道个，应该是伊自然个情致——绕镇个清波亮晶晶个，水旁边尖尖个芦苇、蒌蒿搭仔蓬松个水草，各种小鱼来来回回摆动尾巴游来游去，河滩旁边有眼乌龟像煞是因为好奇而探头张望，还有个，就是此起彼伏个青蛙个叫声了，我勿禁为伊惊艳、为伊陶醉，勒勒此地徜徉，久久勿想离开。
太湖勿愧是中国山水组合最佳个湖泊，因为山水清秀漂亮，湖旁边随便弄弄，就是一个绝对美丽个景观，譬方讲，早年一眼民族资本家营建个私家花园：鼋头渚、蠡园、梅园，侪是湖畔个风光；再譬如三十多年前，央视个外景基地建造个唐城、三国城、水浒城，也侪是经典名胜；又譬如二十年前起，历年叠加营造个灵山大佛、九龙灌浴、梵宫、五印坛城、曼飞龙塔咾啥，一记头成为了华东、乃至全国个热门旅游景点，并且升格为世界佛教论坛个永久会址……
搿个辰光，居于太湖边浪向个无锡人，对太湖风景个开发利用并呒没停下来，终于，勒灵山胜境旁边个日式禅意小镇：拈花湾又一记头高屋建瓴，登场亮相，成为了太湖风景区当中一颗邪气耀眼个明星。
开始，我是冲牢日式禅意风格小镇去个，可能也是为了去看伊面烂漫个樱花搭仔漂亮个夜色，但是，到了伊面，看到了日式建筑群里向密密麻麻个人群，闹哄哄个市场，樱花林里向嘈杂个游客，甚至于渲染得过份艳俗个灯光，我有眼望而却步了，——应该讲景区搿能介做是对个，要个就是爆棚个人气、生意兴隆、色彩缤纷，搿眼元素是顺应普罗大众个审美需求个，我呢，大概真个是老气横秋了，经勿得喧嚣、劲爆，也受勿得五光十色，所以一进小镇，就尽量避开汹涌个人群，勒小镇个周边寻寻觅觅，寻一片契合我个心灵个一丝一缕个美丽。
小镇营建者呒没忘记抚慰我搿能个小众游客，果然，勒镇个外围开辟出了一片芳草茵茵、花径离离、绿水盈盈、小桥蒙蒙、小舟隐隐个境界，勒如屏青山个衬托下头令人心旷神怡。或许有人会得讲，搿能介个景致到处侪是，何必路迢迢跑到太湖边浪个拈花湾小镇来欣赏呢？我讲好就好勒搿片生机盎然个风光就傍勒拈花湾、靠勒灵山胜境，处勒湖光山色个怀抱之中。造园艺术有借景之说，伊是借了蛮多人造搭仔自然个风景，自成了一个风景点呀。应该要搿能理解个，灵山胜境搭仔拈花湾假使勿借了太湖山水宏大个风景想必也会大煞风景个。
勒拈花湾小镇个周边，我最感兴趣个亮点无疑是青蛙个鸣鼓声。久违了呀，田园风光当中最土生土长、也最生动活泼个鸣叫声！从前头，凡是有农田个地方就一定有蛙声，现在，江南个交关农村田野因为过度使用化肥搭仔农药，青蛙已经侪没了呀。
早年，我曾经勒江南个农村务过农，每到春夏季节，田野里领头个就是蛙声，——明明是青蛙鸣叫，偏生要叫伊蛙鼓，实在是鸣声忒像鼓声了呀！而且，是集了群个蛙鼓，田野里向到处侪是，鼓得个沸翻盈天！据说，伊个是青蛙勒求爱个歌唱，是多声部个大合唱，到处是爱情个咏叹，是做爱个欢愉，随后，就是集群个养育后代，即使是绝大多数后代呒没能够成活，但毕竟保持了伊拉称雄田野个优势，搿能，就有了年年蛙鼓，处处蛙鼓，就有了“稻花香里说丰年，听取蛙声一片”。
拈花湾个蛙鼓虽然勿像从前农田里个蛙鼓伊能个狂放，但是也是蛮有眼气势个。一清早，我勒镇个外围散步，一歇歇就拨蛙鼓重重包围牢了：搿一边个大鼓刚刚停歇下来，伊面一边个小鼓又邪气急个敲起来，大鼓小鼓交替演奏，就好像是进入了战斗个方阵当中。
我立勒清清个池塘旁边，享受大自然赋予个天籁，勿禁迷醉，勿禁为之赞叹，赞叹拈花湾小镇勒开发风景游览地个辰光非但呒没忽视环保，还充分注意了搿个关键节点，既要金山银山，更加要绿水青山，归根结底，是保持了太湖湖畔个自然生态，搿是成功开发风景旅游点个一个范例。
我讲，拈花湾个蛙鼓是拈花湾最好个一个亮点，勿晓得大家是否认同呢？
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号