同老相怜

沪语朗读：张华

“同老相怜”

原创：吴莉莉

来源：夜光杯

上海话改编：郭莉

朗读：张华

社区卫生服务中心大门，一年三百六十五天侪开个，来看毛病个差勿多侪是老人。人老病多，迭个高伊个高，药就勿好离开。因为是老毛病，到医院一般也就是配配药，呒没别个事体。来看病个老人，年龄浪还有高、低之分。低龄老人手脚还是蛮健个，自己走过去走回来；岁数大一眼，就要子女代伊拉来配药、或者保姆陪过来，迭个也勿算啥难事体；真正苦个是搿种行走勿便、眼神勿清、听力下降个老人。伊拉独杆子去医院，挂号、讲病情病史、摸袋袋付钞票，侪是一介头。做起来抖抖索索，速度要比人家慢脱一拍、半拍。有一日，付款窗口排起了队伍，有一位老太，年纪差勿多有八十了，捏了几张处方，眯仔眼睛横看竖看，好像就是弄勿明白。伊从队伍里跑到窗口，正想问一句，后头一个六十多岁个老头叫了：排队、排队！老太只好退回来，嘴巴里勒勒咕：“两张化验单我搞勿清爽，就是想问问看呀。”“搞勿清爽问医生去，问收费处搞点啥！”老头子又叫起来，不过声音还是低了八度。后头还有十几个人，大家侪勿响。过脱一歇，队伍里有位阿姨妈妈开口了：“来，让我帮侬看看，省得等一歇叫后头个人等侬。”伊接过老太手里向个单子，扫了一眼，指点了几句，老太太拎清了，仍旧回到队伍里向，定心排队。事体也就算过去了。

有一日中浪，我乘823路公交出去。车厢里老空个，过了两站路，上来一个撑了拐杖个老伯伯。看样子总要八十出头了，个子高高个，举止蛮斯文，穿戴也清爽，伊就坐勒我后头。过脱一歇，飘来一阵叫人勿适意个气味，越来越浓。我有眼怀疑，是勿是座位下头留下了小小囡个排泄迹作，我怕弄龌龊自家衣裳，就朝座位下头看看，但是我座位下头呒没啥物事。气味越来越大，我坐勿下去，就立起来了。迭个辰光就听两个五六十岁个阿姨妈妈吵起来：那能介臭啦，难闻煞了；是呀，有毛病么就覅跑出来了……看样子伊拉两介头寻到气味个“来源”了，就搿能一搭一档吵起来，三勿罢四勿休。我明白了，心里生怕老先生尴尬，勿敢朝后头看过去。但是我个眼神还是往发声个方向，朝两位阿姨妈妈眨眨眼睛。两位总算识相，也勿响了。想想迭个老人家肯定有难言之隐，伊搿能外出勿方便，要勿是呒没办法了，伊哪能肯跑出来呀？对搿种事体，勿必要去辩个对咯错咯，大家就眼开眼闭多多体谅吧。

银行里向，一个白发苍苍老太太正勒勒柜台前头办事体。大概有几个地方没填清爽，柜台里个营业员传出一张单子，问老人几个拼音字母，老太太一面孔尴尬。营业员有眼勿耐烦了：“到底是啥个字母啊，侬讲讲清爽。”老太太更加紧张了，回勿出言话。边头几位阿姨妈妈看勿下去了：“侬态度好点好伐？人家介大年纪，能识字也蛮好了。”“是呀，像阿拉姆妈，连一个英文字母也勿识个。”营业员呒没声音了。等老太太办好事体，大家问伊今年高寿，老太有眼勿好意思了，轻轻较搭大家讲：“我已经92岁了，呒没用场啦。谢谢大家噢。”

上海是全国顶早进入老龄社会个，目前上海老年人口就有四百多万，所以助老工作是当务之急。助老是个艰巨、漫长个大工程，迭个勿可能单靠政府来管，再靠年轻人来帮，老年人之间互帮互助，是邪气重要个环节。身为老人，阿拉自家也要自尊、自爱，互相帮助。

 “同病相怜”个意思大家侪是懂个，葛末，“同老相怜”，也是一样个道理。

精彩回放：
青玉案·元夕
春节，上海人勿吃饺子吃年糕
归彼大荒（下）
归彼大荒（上）
我欢喜侬现在个样子
做蛋饺
螳臂当车
咸肉
外滩个迭根老木桩
出租车个祖师爷——黄包车
小辰光过年
新年，你好
过年

图片来自网络