北方人个饺子，南方人个馄饨（下）
作者：何菲
改写：周红缨
讲述：王幼兰
云吞个馅子搭上海馄饨勿一样，用勿着斩得忒细，肉搭菇经常是整块个，虾是整段个，邪气过念头。据陈梦因勒《粤菜溯源录》里介绍，湖南人勒清朝同治年间开个“三楚面馆”，是云吞面第一趟进入广州。现在个云吞面对于粤港来讲，相当于上海个生煎馒头。
勒欧洲白相了几日天，几顿欧陆大餐吃过，江南人开始想念一碗小馄饨，混合了葱花、蛋皮、榨菜、猪油个小馄饨是庶民个尤物，纤细灵动，吹弹可破，吃一口汤，就好像回到了江南。
十几年前头，上海还呒没高铁，我坐5个钟头个动车到温州去，仅仅是为了一碗前两日勒电视里看到个长人馄饨。搭像猪耳朵一样厚个上海个馄饨皮勿一样，温州个馄饨鲜美皮薄，长人馄饨更是其中个翘楚，是中华名小吃个金牌得主，总店就开勒五马街天一角小吃街个转角浪向。上个世纪30年代，乐清人陈立标勒温州市区铁井栏口经营馄饨，因为伊人长得长，所以叫长人馄饨。
下半日三点多，刚好是小学生放学个辰光，带了孙辈来吃点心个爷爷或者外婆，叫个两碗热气腾腾个馄饨。清润个汤底里向飘勒蛋丝，紫菜、虾干，鲜蔬搭香葱，邪气斑斓，馄饨则是掌握了秀气搭豪迈个黄金把握。淘气个小囡马上九安静下来，乖乖叫个埋头吃下午个点心。岁月静好，就是迭能样子个。
南方人欢喜吃饺子个人勿少，但是，北方人却老少有欢喜吃馄饨个。早几年京城卖馄饨、大多数是挑个担，后来再支起摊，勒地安门一带出没。馄饨的确勿像饺子迭能个丰盈实诚，好蘸醋一口一只。馄饨个魅力在于精致玲珑，一口半只，连同鲜汤，秀气斯文个吃，经常可以作为国宴大席浪向个点心。
谈恋爱个男女，老少有一道吃饺子个描述，却赋予了馄饨交关桥段，甚至成了起承转合个道具。《花样年华》里个女主角苏丽珍，是个小馄饨爱好者，夜色里，伊每日夜里调一件精美旗袍，摇曳了包裹勒旗袍里个纤细腰肢，端仔只钢钟镬子，穿过悠长个上海弄堂，去买碗小馄饨。馄饨加注了伊个曼妙搭缠绵，吸引力法则也使得搿对寂寞个男女，常庄勒馄饨摊外头个台阶浪向擦肩而过，也终于有了暗燃个可能性。
假使调成功饺子会得哪能呢？
虽然讲，饺子缺乏浪漫缥缈个调性，却有得强大神秘个凝聚力、渗透力勒关键时刻显现。小姊妹结婚三年，因为搭丈夫个性格习惯差异忒大、矛盾勿断而协议离婚。伊拉勒约好去办手续个前一夜，一反常态蛮早就回到了屋里，一道包了三十只饺子作为散伙饭。
伊拉从来呒没一道包过饺子，唯一个一次却是配合默契。讲好伊天夜里个饺子勿好剩下来，就像伊拉已经到头个婚姻，再难吃也要有始有终。于是两个人包得相当精心、走心。
伊拉两家头恋爱过，也算披荆斩棘、轰轰烈烈，结婚前创意无限，但婚姻搿桩事体，过来人侪懂个呀。或者是苦于终成眷属个倦怠，或者是苦于未成眷属个遗憾。
吃好饺子，两个人一道安静个汏碗。然后，用一块香肥皂汏手，用一块毛巾为对方揩干，心里如释重负。两个人完成了人生最重要个仪式，就像当时摆了30桌酒，勒台浪向讲“我愿意”一样个美好甘愿。
迭个辰光，舍勿得个情绪像浪潮一样涌来。人投入过感情个物事，是无法计算性价比个。终于，伊红了眼眶先开口了：“要勿然，明朝落班转来，阿拉再一道包饺子伐。”
往期回顾：
图：网络 / 编辑：渺渺