女大当嫁否？
讲述：王宇洲
作者：李佳
沪语改写：周红缨
讲述：王宇洲
朋友是金融机构个白领，8后。阿拉本来呒没啥个交集，是好几年前头一场相亲会浪认得个。类似个相亲会，勿管起了哪能高雅、有趣个题目，基本浪就是一群适龄男女尴尬个聊聊天，也有个别受欢迎或者看“对眼”个，而大多数是：男人认得一群男人，女人结交几个女人，然后收场、各自回家。勒搿种场合认得个朋友，老少有长久个。伊，倒是个例外。
阿拉每趟联系，她勿是勒勒相亲、就是勒相亲去个路浪向；伊主动联系我，也差勿多侪是叫我陪伊去相亲个。
“我姆妈来了，天天搭我唠叨、催我。”所以啊，伊又去了某一趟相亲会，认得某位红娘，呒没想到红娘介绍个“优质男”居然是“婚托”，收钞票、同时搭几个女性谈朋友。
勒我个身边，大约摸可以分成功三类人：一类，是像我朋友搿种“恨嫁”个，伊拉是推动相亲市场价格水涨船高个主要力量；一类，是佛系个，随缘；还有一类，是“战斗型”个，个性鲜明，要么坚持不婚主义。最作孽个是第一类，伊拉身浪向往往背勒各种压力：家庭个，社会个，甚至还有自家个负疚感，以及，对未来个恐惧……
我勒迭能个状态里挣扎过10年：父母勿理解，同事讲风凉闲话，甚至还看笑话个，侪像是芒刺在背。我也曾经积极个去“解决”：最夸张个记录是一日天相了四场亲，大概比公司个HR还要忙。假使勿结婚，搿种状态大概就要变成一只死结了。
直到有一天，一位好朋友开玩笑，讲：“侬假使拿相亲个辰光用来看书，可能两只博士也可以考出来了。”我再如梦初醒，认真个思考起人生来，从此决定转变，选择自家所要个生活。
世界浪品类千万、各有特色，本来就因为勿同而精彩；而自认为聪明个人，却偏偏要为自家设定各种框框，竭力让彼此相同。有个框框邪气强势，以价值、原则、概念等面貌出现，显得迭能再是“理所当然”，甚至勒“人之初”就开始渗透，进入人个思想、行为、观念当中，等长到一定个年纪，也分勿清阿里一眼是自家个、阿里一眼是框框强加个，甚至有人勿由自主个做起框框个“卫道士”、理直气壮个干涉起别人来。
最近，“知乎”浪向有只帖子邪气“火”，讨论个就是勿结婚个女人今后个日脚哪能介悲惨。跟帖个人讲：女人勿结婚，等父母过世之后，呒没男人、呒没小人，一个人终老，哪能哪能个孤独，好像婚姻是解决问题个唯一办法。
“孤独”，是人与生俱来个，“一个人个孤独”搭“一群人个孤独”区别有多少大？大概呒没多少人去想，也勿敢去想。假使真个去想了，只怕会地发觉：婚姻有个辰光只是“遮眼法”，“如人饮水，冷暖自知。”
我问朋友：“等结婚了，后头侬打算哪能介过呢？”朋友呆牢了，呒没回答……
我老想拿自家读过个几只故事讲拨伊听：有个单身姆妈带囡儿到乡下头去，住了一间洒满阳光个小房子，每日天吃新鲜蔬菜，日脚过得精致又舒畅；日本有几个单身个阿婆住勒一道，每个人一间房间，彼此之间相互照顾、过得既自在又温馨。也许，搿眼侪是人家个生活，呒没办法直接借用，但生活真个勿是只有一种方式，也呒没必要为某种执念搞乱全部生活。为啥勿多走走、看看，或者停下来想一想，想办法寻找自我，也来发现发现生活个其他可能呢。
往期回顾：
图：网络 / 编辑：渺渺