大师
讲述：王浩峰
作者：魏福春
来源：微型小说月报
沪语改写：冯济民
诵读：王浩峰
大师姓胡。一开始见面辰光大家以胡大师相称，胡大师还摆摆手谦虚个讲：勿敢。当时个胡大师呒没一点架子。
后来胡大师名气慢慢叫大起来了，一般个朋友请勿动伊了。迭个辰光，就勿仅有了腔调，还有了脾气。老三搿日天就领教到了。
老三搭胡大师住勒一个小区，是小兄弟。老三欢喜交际，朋友勿少，伊有饭局总会叫上老胡。老胡成了大师后，有应酬也勿忘带上老三。
搿日天是早就约好个，只是胡大师到了酒店才想起身边少了一个人，于是拿起手机，问：勒啥地方？是打拨老三个。老三讲勒屋里向。搿就过来伐！好个！听得出老三有眼激动。
老三到个辰光酒席已开始。伊一进包房就高兴个喊道：胡大师，我来了！想勿到胡大师眉头一皱：啥地方来个胡大师？大师！老三一惊，点着头讲：是，大师。坐伐。大师大度个挥了挥手，老三战战兢兢个坐了下来。
老三伊日天呒没敢多讲闲话，也呒没喝几口酒，伊怕一勿小心讲错啥遭大师当头棒喝！伊呒没想到胡大师介顶真。但此胡已非彼胡，老三对迭位兄弟也已只有五体投地个份了。
大师有异禀！
提起迭个，还得从老三讲起。
老三伊拉有空个辰光欢喜斗地主。老胡，伊个辰光还是老胡，总归是输多赢少。
讲起来也奇怪，伊勒一日睏中觉辰光，勿晓得哪能从床浪掼了下来，掼得还勿轻。醒来之后——
搿日是个礼拜天，老三呒没饭局，妻子带了囡儿外出了。伊一个人夜里勒屋里吃了点小老酒，然后拿起手机想叫上几个人斗地主。结果一圈电话下来独缺老胡——老胡勿接电话。老胡单身一人，能去啥地方？老三直奔伊屋里而去。
门铃响了有一歇，呒没动静。迭小子有方向了？老三正要离开，门忽然开了，老胡眼皮瞌充个：晓得侬要来送纱票个。老三听得莫名其妙，一拍伊个肩膀：侬个胡戈腊思，瞎讲啥呢？老胡名字叫腊思。
啥人晓得搿日夜里胡腊思真个是鸿运当头，短短两个钟头，老三伊拉已经输得昏脱了。之后个几次侪是搿能，只要胡腊思想赢，绝勿会输，老三伊拉彻底服了。
老胡有了超凡脱俗个能力，最高兴个莫过于老三，伊有炫耀个资本了，走东到西侪会提起迭个兄弟。老胡成为胡大师，应该讲有老三个一份辛劳。当然有人对此付之一笑，汪老板就是一个：迭年头，大师也太多了点？
汪老板是开小烟酒店个，有辰光也搭老三伊拉斗斗小地主，对老胡多少是了解个。
迭个闲话老快就传到了胡大师耳朵里，伊笑着对老三讲，请汪老板吃饭。
有人请吃饭，汪老板是一口答应。饭店是家小饭店，几个人坐定后，胡大师突然定定个看着汪老板：侬最近养了个小女人！汪老板大吃一惊，老三也疑惑个看着胡大师，要晓得汪老板极怕老婆，平常搭伊拉斗地主也要老婆点头。勿料汪老板面色苍白：老——胡大师，搿顿饭我请！
汪老板刚搭汏洗脚店个小花好上，迭呒没人晓得。
大师声名远扬，经常有老总慕名而来，但大师分寸控制得咾好，勿轻易道破天机。当然也有例外。搿日天已搭大师成为好朋友个张总设宴。张总个朋友非富即贵，大师也是高兴，多喝了几杯茅台。就勒迭个辰光，张总请伊拔座席浪个一位中年男子看看。大师放下酒杯，屏气凝神个看着伊个人，好一歇笑道：还好，差一点就坏勒小三手里！众人一惊，再看伊个男子，腾个一记立了起来，林——张总忙起身打圆场，可闲话还呒没出口，伊个人已扭头离去。
张总气得搭大师断了往来，讲真勿能相信啥个大师！啥人有小三侪有可能，唯独林局，林局夫妻恩爱，从呒没有过绯闻……
大师露了原形，又成了胡腊思。啥人晓得几个月后张总登门，伊位林局终究还是倒勒小三个身浪。胡腊思暗笑，百试勿爽，哪搿眼鸟人有几个是正人君子？勿过胡腊思再呒没出山，伊清楚自家个能耐。
胡腊思勿出门，名头却是越传越远，越传越神，迭是后话了。
往期回顾：
图：网络 / 编辑：渺渺