中元节 地官诞辰 盂兰盆会
作者：薛理勇
沪语改写：边秦翌
沪语讲述：周红缨
中国道教尊天官、地官、水官为“三官”，东汉辰光，黄巾起义个领袖，太平道个创始人张角，五斗米道个创始人张鲁、张修已经拿“三官”尊为神道了。后首来，道教宣扬“三官”个职能，天官赐福、地官赦罪、水官解厄，再用“三元”来搭配“三官”个诞辰，也就是上元正月十五是天官个诞辰，中元七月十五是地官个，下元十月十五是水官个。乃么，迭三个“十五”侪成了道教神道个节日。要举行各种风俗活动，其中又以“中元”个七月十五，也就是地官诞辰个活动最最隆重闹猛，搿一天也拨叫作是“中元节”。
唐朝王建勒《宫词》里向写：“看著中元斋日到，自盘金线绣真容。”看来，中元作为重要个祭祀日，勒唐朝或者唐之前就已经有了。
……
中元节也叫“盂兰盆会”，勒街浪向，老百姓拿竹竿折成三五尺长，用三根竹竿做成功一只支架，高头摆只盆一样个物事，搿就叫“盂兰盆”。宋朝个高承勒《事物纪原》里向搿能介讲：今世七月十五日，营僧尼供，谓之“盂兰斋”者。按《盂兰经》曰：“目连母亡，生饿鬼中。佛言：须十方众僧之力，至七月十五日具百味、五果以著盆中，供养十方大德。后代广为华饰，乃至割木割竹，板工巧也。今人弟以竹为圆架，加其首以落叶，中贮杂馔，陈目连救母画像，致以祭祀之所，失之远甚矣。”
个人以为当时辰光，七月十五“盂兰盆会”是只佛教个节日。实际浪，《盂兰经》里向讲：有个人叫目连，娘死脱了，托梦拨伊讲投胎到饿煞鬼里去了，伊要去救娘，佛就指点伊，只要勒七月十五搿日，供只摆“百味五果”个盆，就好拿娘救出来个。但是呢，大家还是照样认为七月十五是佛教节日，讲“连”就是“莲”，还用荷花叶子作盆，盆浪向有“目莲救母”个画像。搿实在是搭佛经个本意远开了八只脚呀！
……
宋朝陆游写《老学庵笔记》，里向对盂兰盆会有自家个见解：
故都残暑不过七月中旬，俗以望日（即十五）具素馔享，先织竹，作盆盎状，贮纸钱，承以一竹焚之，视盆倒所向以占气候，谓向北则冬寒，向南则冬温，向东、西则寒温得中，谓之“盂兰盆”，盖俚俗老媪辈之言也。
勿管哪能讲，中元节个“盂兰盆会”风俗勒北宋已经相当流行，大部分人认为搿种风俗从南北朝就开始有了，而且搭佛教个“救难”有得关系。阿拉搿歇已经呒没办法晓得，中元节个道教“设大会，焚钱山，祭军阵亡殁，设孤魂之道场”搭仔佛教个“盂兰盆会”，到底阿里一只开始得更加早眼呢？到底是道教影响了佛教，还是佛教影响了道教呢？反正，宗教个事体，教里向个人也搞勿清爽，普通老百姓就更加搞勿清爽了。
实际浪，文化个事体也呒没必要一定要搞得介清爽，侬假使以为自家侪搞清爽了，讲勿定会得落到另外一只“搞勿清爽”个“陷阱”里向了。
假使拿宗教世俗化，就会得发现，宗教勒推广传播个过程当中，搭商业还是蛮像个。宗教树立个神道或者神职人员，就像商业浪向个品牌，产生一种“品牌效应”；宗教节日搭仔商业个“品牌推广”也邪气相似，呒没忒大个区别。所以讲，勿管是道家佛教，目的大概侪是一种商业个“促销”行为，想要更加多个人参与到搿种活动当中去。
中元节勒勒中国个岁事当中，算是只邪气重要个节日。搭全国个其他城市一样，上海个中元节活动有得道士个“打醮”，也有得和尚个“盂兰盆会”。刻刊于道光十九年（1893年）个上海人张春华撰《沪城岁事衢歌》当中讲到：
赛神恰值约澄霄，城市灯红和管箫。
岁岁周泾运绕郭，孟秋十五看青苗。
张春华还特别注释：“七月十五日祭赛如清明节。溽暑初过，烈日犹酷，邑神之随从者，大多以夜分为良。郭外绕西而北者为周泾庙，必由此入城，谓‘看青苗’。”诗里向个周泾，是上海县城外头个一条河浜，大约摸勒现在个西藏南路。每年七月十五，盛夏刚刚过脱，天气还热勒海，上海人就要举行盛大个“赛神”活动了，道教拿城隍庙里向城隍下属个“官员”抬出来，从南门出城，绕到西城外头个周泾再进城回转来。
上海个秦荣光勒《上海县竹枝词·岁事》当中也讲：
盂兰盆会盛中元，水陆莲灯合市喧。
地藏欣开今岁眼，捧香遍地插黄昏。
词当中讲个“水陆莲灯”，是江南中元节邪气普遍个风俗活动，“水陆”就是“水陆道场”；“莲灯”可能是《事物纪原》里向讲又一趟变化伐。大家勒荷叶浪向插枝小蜡烛，或者用纸头叠成功小船，勒船浪向插枝小蜡烛，点燃之后摆到小河浜或者池塘里去，用来祭悼无“家”可归个冤魂野鬼。毛泽东个诗《送瘟神》“借问瘟君欲何往，纸船明烛照天烧”，套用了中元点水灯个风俗。
中元节个“盂兰盆会”风俗，勒宋代辰光随了佛教传到日本。今朝，“盂兰盆会”勒日本京都一带还是庆祝丰收、祈祷吉祥个重要风俗节日。讲勿定，人家已经申请拿“盂兰盆会”列入“世界非物质文化遗产”了。而勒中国，晓得“盂兰盆会”曾经是中国中元节主要个风俗个人可能已经勿多了，想想真个是蛮滑稽个。
朗读者
往期回顾：
图：网络 / 编辑：渺渺