上海人个住房（中）
沪语朗读：张正风
上海人个住房（中）
作者：王汉梁
改编：丁迪蒙
朗读：张正风
上海最推板个住房啦，就是棚户区个棚户，搭仔滚地龙了。住勒里向个居民侪是最底层个劳苦大众，大部分呢，是倒马桶个、清垃圾个、或者是拉老虎塌车个苦力。
棚户区里向个住房是邪气简陋个，墙壁呢，是用竹爿掺仔一眼烂泥做个。屋头顶呢，浪向是用茅草盖个。房间里向个间隔也是泥墙。其中起到支撑作用个房梁、立柱侪是用粗个毛竹。茅草房子邪气矮，进门个辰光要弯腰、低头个。棚户一间挨牢一间，路口头呢，有公用个水龙头，居民要排队拿水一桶一桶个拎回去，倒勒勒水缸里向用个。所以呢，棚户区个烂泥地浪向总归是湿嗒嗒个，就算勿落雨，地浪向也是滑溻溻个。
滚地龙呢？还要简陋。是只用一眼竹爿爿来作为支撑，上头用一眼麻袋啊、帆布老啥来遮遮风、挡挡雨。到了夜里向呢，人就往里向一钻，勿管从缝缝里向透进来个是西北风，还是天浪向个星光脱仔月光。
1949年以后，上海是最先拿滚地龙全部拆脱个。并且呢，勒勒原来个地方建造起了工人新村。曹杨新村迭个可能就是大家侪晓得个典形。但是，极少数一眼棚户啊，一直到六十年代个中期勒勒上海个边远地区啊还有。
伊眼花园洋房个主人，经过五十年代个三反、五反、反右派老啥个运动，已经是大伤元气。过去是西装革履、大腹便便个洋房主人个，只好着仔件皱巴巴个中山装，进进出出低了头，夹紧了尾巴做人。后来呢，尽管部分房子经过做工作，自愿或者是勿得勿“自愿”个捐献拨了国家，但房产大部分仍就是归自家个，里向个豪华摆设也基本浪向没啥个变化。
搿种局面维持到史无前例个浩劫时期，拨彻底破坏了。豪宅个主人只要是勒上海个，侪遭到了残酷斗争、无情打击。除脱仔批斗、扫马路之外，只让伊拉住洋房里个灶披间、佣人房。交关人家干脆拨扫地出门。拨抄家查封个花园洋房有个做造反队司令部，有个搬进去老多个住房困难户。搿眼人住进去以后，有个地方末拨砌墙、打洞，有个柚木地板浪向拨伊拉敲了交关钉子，雪白个墙壁浪向呢弄得像个大花脸，过道里向装了煤气灶，变成了厨房间，汽车间破墙开窗做了卧室了，花园个大草坪浪则勿伦勿类地搭起了交关个棚棚。
搿眼房子直到八十年代初，再勒勿断个“落实政策”声当中陆陆续续归还原主。但是，经过介长辰光个折腾，创业个业主早已经所剩无几，落实政策以后住勒里向个人大部分是伊拉个后代或者是亲戚。再讲，洋房个鼎盛时期已经过去了，伤筋动骨以后个豪宅回到伊眼已经呒没后劲个小辈手里向，再哪能维修，也恢复勿了当年个豪情搭仔气派了。
伊眼外墙浪向爬满仔爬山虎个老洋房勒过脱几十年之后，倒是时来运转，居然又大出风头了。伊拉虽然徐娘半老、但是丰韵犹存，拨一眼有眼光个香港、台湾个富商搭仔欧美人士一眼就相中。随勒上海个越来越国际化，外来个实力派人士最欢喜个就是搿种充满仔沧桑感个老洋房。伊拉造形典雅，结构高敞，布局气派，搭新开发个豪华楼盘相比简直是不可同日而语啊。搿眼历史悠久个洋房吃香起来个另外一个原因，是伊拉侪是国际著名个设计师创作个，独一无二个精品，现在已经成为了古董。花笔钞票拿伊重新装修以后，勿管是自家住，还是做外企个驻沪机构侪是邪气合适个。
棚户区搭仔花园洋房是上海人住房个两极。勒搿两种房子里向居住个上海人呢，只占全市总人口个一小部分。
精彩回顾：
图片来自网络