香港旅遊發展局9月頭正式展開「西九龍」地區遊推廣，範圍覆蓋油麻地、佐敦和西九文化區一帶，更加聯乘國際藝術家團體「FriendsWithYou」，喺西九文化區藝術公園展出以繽紛角色造型為主題嘅大型藝術裝置。日期由9月23號至10月14號，而尖沙咀太空館亦化身成巨型微笑「菠蘿包」，記者率先為大家現場直擊！
撰文：冰 ｜來源：香港旅遊發展局、新假期編輯部
香港太空館｜巨型微笑「菠蘿包」
香港太空館改頭換面化身成巨型微笑「菠蘿包」，蛋形外牆會貼上 FriendsWithYou角色嘅經典笑臉，樣子精靈可愛，遠睇經已非常吸睛，吸引咗大批市民爭先留影。今日（9月24日）記者就到現場實地考察，下午4點左右到達現場，見不少路人經過都會拍照打卡，大人小朋友都「無一幸免」被太空館吸引。不過太空館「實物」近睇似乎有點灰沉，比起參考圖片睇落無咁耀眼，似乎有P圖之嫌！
雖然喺平日，但都聚集了不少群眾。（圖片來源：新假期編輯部）
記者訪問了幾位市民，陳小姐喺網上見到消息，就即刻抽時間過嚟睇「真身」，仲表示覺得太空館今次以新面貌示人，感覺幾新鮮。（圖片來源：新假期編輯部）
有市民經過見到都會停下腳步影相，不過大家影相時記得要保持社交距離呀！（圖片來源：新假期編輯部）
可惜一架體積略大嘅美食車停泊咗喺太空館面前，相當阻礙視線。（圖片來源：新假期編輯部）
正面影過去，太空館笑臉嘅右邊「面頰」有一半都被美食車擋住。記者要特登遷就角度先可以避過架車影到太空館全貌。（圖片來源：新假期編輯部）
小朋友Velory表示公仔非常可愛，更加同記者講稍後會去埋西九文化區同「Friends With You」嘅大型充氣公仔影相，Velory媽媽喺網上留意到呢個大型菠蘿包嘅出現，專誠帶埋囡囡過嚟打卡影靚相，睇嚟今次活動唔少市民都幾受落。（圖片來源：新假期編輯部）
唔少人都係從網上知道消息，專程過嚟打卡。（圖片來源：新假期編輯部）
大大粒「菠蘿包」就屹立喺尖東呢片大地，眼仔大大圓碌碌好盞鬼！不過呢張官方照片，太空館就比較「白淨」，有P圖之嫌！大家去打卡時可能都要P下圖了～（圖片來源：香港旅遊發展局）
可愛嘅笑臉同一旁嘅高樓大廈形成強烈對比。（圖片來源：香港旅遊發展局）
西九文化區大型藝術裝置「FriendsWithYou」！
巨型發光雲朵＋七彩繽紛造型公仔
藝術家Samuel Borkson與Arturo Sandoval III組成藝術團體「FriendsWithYou」同旅發局合作，喺西九文化區藝術公園海傍位置，展出多個佢地筆下嘅角色造型充氣公仔，足足有成12隻，啱晒大人小朋友齊齊打卡！其中超巨型雲朵最為矚目，入夜後更會發出光芒，點亮整片夜空，散發出夢幻嘅感覺，非常適合影相！部分角色更會化身神秘吉祥物，不時遊走西九文化區藝術公園，大家不妨去捕足佢地嘅身影，但影相時記得要同角色人物保持返1.5米社交距離啊！
展出嘅童趣角色包括Little Cloud、Rainbow Worm、Jelly、Rainbow Kid、lil’ Flower、Little Mushi等。（圖片來源：香港旅遊發展局）
招牌角色Little Cloud化身巨型雲朵，足足有至少3層樓高，長度仲長過巴士車身，勁壯觀！（圖片來源：新假期編輯部）
記得同吉祥物影相都要隔返1.5米距離～（圖片來源：新假期編輯部）
新角色「啫喱」雖然唔喺其中一隻充氣公仔，但佢會化身成為吉祥物，不時突襲西九同大家影相！（圖片來源：新假期編輯部）
角色 Rainbow Kid。（圖片來源：新假期編輯部）
角色 lil’ Flower。（圖片來源：新假期編輯部）
角色 Hug Bug。（圖片來源：新假期編輯部）
5
5
角色 Peanut Butter。（圖片來源：新假期編輯部）
角色 Little Mushi。（圖片來源：新假期編輯部）
角色Little Mushi。（圖片來源：新假期編輯部）
角色Magic。（圖片來源：新假期編輯部）
Rainbow Worm都喺全球首度亮相其中一隻新角色！（圖片來源：新假期編輯部）
蟲蟲size都唔細，背面睇脹卜卜咁勁得意。（圖片來源：新假期編輯部）
場內仲有QR Code可以比訪客用AR Filter去影相。（圖片來源：新假期編輯部）
Filter可以比你隨意喺場內加入虛擬公仔一齊影相，玩味十足！（圖片來源：新假期編輯部）
入夜之後巨型雲朵更加會發光，好壯觀！（圖片來源：香港旅遊發展局）
國際藝術家Samuel Borkson與Arturo Sandoval III首次喺亞洲大規模展出就揀咗香港。（圖片來源：香港旅遊發展局）
西九文化區「FriendsWithYou」大型藝術裝置
地址：西九文化區藝術公園（顯示地圖） 及 香港太空館（顯示地圖）
藝術裝置展示日期及時間：
9月23日 04:00pm – 09:30pm
9月24日至10月14日 11:00am – 09:30pm
注意事項：
1）最後入場時間為9pm。
2）惡劣天氣如三號強風信號及暴雨警告會暫停開放。
3）入場無需預約，可到Facebook專頁瀏覽最新消息及輪候情況。
4）寵物不能進場。
5）入場人士需要全程配載口罩及保持社交距離。
