老上海的茶馆（下）

沪语朗读：渺渺

老上海的茶馆（下）

来源：老有上海味道

作者：沈嘉禄

改编：郭莉

推荐：丁迪蒙

朗读：渺渺

上世纪二十年代，到上海创业个广东人越来越多了，锁定广东茶客个茶楼也就应运而生。到了三十年代，上海个广东茶楼已经达到相当规模，一批知名个粤菜馆也开始兼营早茶。广东茶室个环境整洁，茶点适口，收费公道，服务优良，点一壶香茗，可以孵半日天，肚皮饿了叫一客马拉糕、一客滑肉面，不过块把大洋。

河南路广东路口，原来开过一家同芳居茶馆，迭个广东茶馆跟诗人苏曼殊有关。苏曼殊勒上海辰光落脚勒同芳居附近，就成了此地个座上客，蛮多诗文也是伊吃茶辰光个灵光一闪出来个。一旦稿费拿到手，板要到同芳居去吃一顿。同芳居里有一种名叫“摩尔登”个糖，本来是为吃鸦片个人准备个，因为鸦片鬼一般口感蛮苦，需要用甜食来调剂调剂。又据说搿种糖茶花女也特别欢喜个，苏曼殊听了搿种呒没根据个传说，也一买就是好几瓶，还要自封“糖僧”。有一趟呒没钞票还要买糖，居然拿金牙齿拔下来顶钞票！

南京路四川路口开过一家老旗昌茶馆，也卖茶点，一班咸水妹侪聚集了搿搭勾引外国烂水手；要是妓女相聚，常庄是勒昼锦里搿面个一林春茶馆；葛末云南路浪个玉壶春呢，是白相人吃讲茶个地方。

啥叫吃讲茶？其实就是矛盾双方借吃茶名义到茶馆来谈判，请出迭块地皮浪讲言话算数个白相人来调停。假使双方侪愿意和解，调解人就拿红绿两种茶混勒一只大碗里，双方侪一饮而尽。要是调解勿成，白相人就呒没了面子，双方矛盾就会激化，葛末茶碗一掼，台子一翻，大打出手个事体就会发生。

茶馆对吃讲茶是一向头痛个，但是开茶馆个老板跟白相人又有千丝万缕个关系，勿隑黑社会牌头，哪能开得起来？云南路浪曾经有一家茶馆老板居然冒充蒋介石笔迹题写匾额，一时浪向真个吓得地痞流氓勿敢去惹伊，但辰光一长就穿绷了，还拨警察砸了招牌。不过当时茶馆为了清静，常庄贴一张“奉宪严禁讲茶”个标语。奉宪？难道当时宪法有搿能一条？勒老舍先生个《茶馆》里也出现过吃讲茶个场景，可见南北茶馆里向，有勿少相同风气个。

萝春阁也是上海老茶馆之一，是黄楚九开个。迭个茶馆附设书场，有辰光也上演绍兴戏搭锡剧，吸引勿少茶客。后来伊又卖起了生煎馒头，因为做得好，吃生煎馒头个人超过了吃茶个人。现在，萝春阁还勒海，以生煎馒头为特色，一般上海人侪勿晓得伊原来是一家茶馆。

南京路浪还有过一家仝羽春茶馆，搿是拿古代两位对茶作出重大贡献个茶道中人卢仝、陆羽个名字合成个，邪气雅致，据说是近代小说家吴趼人代伊起个名字。迭家茶馆有戏台，京昆淮扬样样侪演，通宵达旦，勒当时也算是开一时风气。

旧上海茶馆每到大年初一，老板就会拨茶客讨一只口彩，让伙计随茶奉送一碟橄榄，因为橄榄样子像元宝，茶就俗称元宝茶了。伙计忙勿停个向茶客恭喜发财，茶客当然也要送上一份小费。迭个辰光，还有一种人也勒此地吃茶，伊拉就是年根岁末躲债躲得走投无路个倒霉鬼，搿歇，伊拉可以松口气了。因为搿歇辰光就是迎面碰到讨债鬼，债主也勿可以提铜钿个事体，搿是旧上海市场规矩中人情味道个一面。

旧上海个茶馆，是三教九流聚集个场所。除脱仔茶客，还有涎唾水乱喷个说书先生、善于周旋个生意人、目光阴笃笃个包打听、贩卖古董字画个掮客、测字看相带算命个“铁口”“半仙”，另外还有勿少值得同情个卖唱姑娘、卖卖瓜子搭仔香烟个小贩咾啥。勒茶馆里，还有一眼人是面带冷笑个旁观者。伊拉就是书生意气、激扬文字个作家、记者，一壶茶，一支烟，一份报纸，一坐就是大半天，为啥？为了寻找素材，了解社会，结交各色人等，搿搭真是一个社会缩影，一只取之不尽个社会信息库。

还有一个现象，就是从前男女私奔，侪是约勒茶楼为出发地点；而离婚辰光，也侪勒茶楼谈判，双方各请几位朋友来“吃讲茶”，双方客客气气谈好条件，男方付拨女方一部分钞票，离婚就算成功了。

据史料记载，清末民初，上海茶楼有160多家，但是实际数量勿止搿眼。到抗战胜利，已经发展为600多家，而到了建国前夕呢，至少有800家，其中还有交关是带老虎灶兼书场个小茶馆。

旧上海茶馆个故事啊，真是讲勿光啊！