香莴笋
沪语朗读：仝康民
朗读者
香莴笋
作者：陆林森
来源：夜光杯2019.6.1
上海話改寫：郭莉
朗讀：仝康民
推薦：丁迪蒙
莴苣，长得有眼像春笋，所以也叫莴笋、莴苣笋。伊有一种天然个清香味道，所以上海人也叫伊“香莴笋”。我小辰光，以为迭个词是“乡下笋”，后来再晓得自家大错特错。啥个“笋”勿长勒“乡下”，会得长勒水泥森林里呢？
香莴笋上市個辰光，一根根长得粗粗壮壮，一看见伊，就晓得春天来了。削了皮，就可以看见里向绿绿嫩嫩个莴笋肉，用手一掐，水渍渍个，水也好像是绿莹莹个，看得人涎唾水溚溚渧，恨勿得咬伊一口。
搿歇辰光，家家户户灶披间里，也飘起了香莴笋个清香气味。香莴笋好吃，价钿也勿贵，用勿脱几钿，就好买几根。伊勿像差勿多辰光上市个春笋，贵得赛过猪肉鱼腥。
香莴笋吃法邪气简单：清炒、冷拌、烧汤侪可以个，还可以像苏东坡讲个，煠了吃、烘了吃。要是拿香莴笋切成丝，跟鸡蛋打勒一道炒，也是一只勿错个下饭菜。
前抢把，我搭几个朋友勒勒大连路昆明路口个一家小饭店，看见菜谱浪有“清炒莴笋丝”，马上点了一份，菜单下了厨房，大师傅拿香莴笋切成丝，大火热油一炒，翻了几翻，撒一把葱花，装盆上桌。哦哟！赛过春色一般，满眼個青翠碧绿。吃起来是清脆爽口，齿颊留香！一记头大家竟然对浓油赤酱呒没胃口了，一直呒没人对红烧肉动筷子。
小辰光，阿拉屋里蛮穷個，又是住勒破破小小个弄堂里，我姆妈总归要等到小菜场要收摊快了，再去买菜。迭个辰光个香莴笋，价鈿便宜，一样新鲜個。买回来舍勿得用油去热炒，就切成丝，撒眼盐，翻几翻，再抮脱盐水，撒眼葱花，然后拿一沰沰豆油烧得滚滾烫，朝香莴笋丝浪向一浇，“刺啦——”一记，屋里向馬上就飘起了一股清香個味道。有常时，姆妈拿香莴笋切成滚刀块，也用一眼盐拌一拌，抮脱水，再勒勒酱油碟子里倒几滴麻油，就搿能蘸了吃。看牢麻油慢慢叫散成了一片片油花，我心里觉着有种开心，嘴巴里嚼出来个，呒没生活个清苦，倒是单纯个清香。我竟然从来也呒没去想过，勒小弄堂外头，是勿是还有比迭个清清脆脆个香莴笋更加好吃个物事。
到了热天式，香莴笋价钿就更加便宜了，乃末就买一大捆回來，刨皮、切段，用盐腌腌好、暴晒，搿只味道就更加崭了。上海人家吃泡饭，人人侪欢喜咸香莴笋迭只小菜个。
有种人家，香莴笋吃个只是茎，勒阿拉屋里，姆妈是舍勿得拿香莴笋叶子厾脱个。总归拿伊切碎，用盐拌拌捏捏，再抮脱香莴笋叶子裡个苦水，等米饭潽过汤，拿腌过个香莴笋叶子倒进饭镬子一拌，盖好镬盖焖。一歇歇，屋里向就侪是香莴笋个清香，散也散勿出去了。搿种情状，搿只香味，一直存放勒我個脑海深处，几十年来，从来也呒没忘記脫過。
现在，每趟到吃香莴笋個辰光，我也像当年我姆妈一样，拿香莴笋切成细丝，或者切成滚刀块。奇怪个是，香莴笋清香还是一样，味道偏生远远勿像从前了。“菁菁何所有，莴苣独牛耳。从苦可自珍，供盘况潇洒。”是勿是因为姆妈老早就离开了我，香莴笋就呒没当年味道了呢？还是因为，我从破旧小弄堂搬走了，几十年来，我就呒没了小辰光个搿种感觉了呢？
推上海言话叙身边事体
究吴侬细语吟诗词歌赋
往期回顾：
图片来自网络