风中跌倒勿为风 / 开普饭

沪语朗读：柳钟晔

朗读者

风中跌倒勿为风

来源：中外美文名篇

作者：林清玄

改编：丁迪蒙

朗读：柳钟晔

路过乡下头个一只院子，看见里向有个小囡勒勒哇啦哇啦哭，做姆妈个看起来是邪气心痛，蹲勒旁边安慰伊。

只看见姆妈一只手围牢小囡，一只手勒勒用力个拍打地皮，搭小囡讲：“哎呀！侪是搿个地浪向勿平整，害得宝贝掼倒，姆妈脱侬打伊，打伊噢！”姆妈拍地浪个动作看上去邪气滑稽、夸张，搿个哭闹勿停个小囡勿哭了，笑起来了。

我立勒旁边看勒海，心里向感到邪气个温馨。同时，想到了从前我个姆妈也是曾经搿能来安慰我个。

勿只是我个姆妈，从前个父母几乎侪是搿能安慰小人个。奔个辰光拨树枝绊倒了，就拿树枝折断脱，讲：“坏树枝！哪能可以拿我个宝贝绊倒啦。”走路勿当心，跌脱一跤了，就打骂土地：“坏蛋，哪能可以害得我个乖囡掼跤啊！”甚至于根本是呒没啥原因，掼跤了，也寻勿到啥物事可以责备个，就去骂风：“侪是风呶，吹得我个心肝宝贝掼脱一跤。”

小辰光，阿拉侪会得信以为真，认为自家之所以掼跤是因为风，因为土地或树枝个问题，所以也会得像父母一样，寻只借口来安慰自家，却呒没意识到，是自家走路勿当心。

记得有一次，我勒房间个门口头跑步，勿小心掼脱一跤，头撞破脱了，血也流出来了。姆妈从灶披间里向快点奔出来，伊左看右看，就是寻勿到可以打、可以骂个物事，因为，前头个地皮邪气个平整，旁边也呒没树枝，也呒没小石头。

姆妈呆了蛮长一段辰光，我已经自家立起来了，伊还呆勒伊面，手里向拿了一把镬铲，样子看上去有点滑稽。

姆妈看见我朝牢伊看，认为我又要哇啦哇啦哭了，就突然之间用老老大个声音去骂老天了：“侪是介恶个大风呀，拿我个宝宝吹得掼跤了！”

我摸摸头浪向个伤口，搭姆妈讲：“勿是因为风，是我自家勿当心掼下来个呀！”伊个辰光，庭院前头确实只有阳光，一丝风也呒没个。

搿个辰光，姆妈笑了，笑得像阳光一样个灿烂，伊走过来检查我个伤口，邪气欣慰个讲：“侬长大了！”

妈妈个意思是我已经长大了，可以承担自家个错误搭仔失败了。

当阿拉发现，无论是啥个形式个掼跤，侪是自家个勿当心，而勿是去寻找借口。就像阿拉勒情感搭仔婚姻浪头个掼跤，也要像勒小辰光一样……即使是地勿平、荆棘横路、风狂雨暴，侪勿应该是阿拉掼跤个借口。最应该检查个是错误搭仔失败。

小囡个掼跤顶多是皮肉受眼伤，姻缘个挫败也顶多是锥心刺骨，并勿会伤到情感个本质。因此，一个人勿应该勒爱当中受伤了，就失去爱个勇气；也勿应该感到痛苦了，就失去承担个心。要寻到生命最内在个本质，是勿能有任何借口个。

勒风雨当中掼跤，勒情爱当中流泪，搿侪是人生勿可避免个旅程。假使阿拉勒每一段个旅程当中，侪能学习到更广大个胸怀，侪能够勿失去真爱个勇气搭仔美好个追求，葛末，一切个挫败勿也侪是有深刻个意义个嘛。

我立勒海看搿幅拍打土地安慰小囡个图画，一面回忆起往事，一面想到，阿拉个人生可能会得永无平静，应该做到个是使心安宁。