上海弄堂个烟火气
作者：王国杰
讲述：郭健
辣辣石库门里过日脚，顶顶讨厌个要算生煤炉。
改革开放前，上海还呒没普及煤气，只有洋铁皮做个煤炉。生煤炉其实是体力生活。一筐煤球就是五十斤，阿拉算是教书先生，哪能扛（ang）得动？只好叫煤球店送货上门。上海男人还要到煤球店去买一大堆废木料，借部推车五斤狠六斤车回来劈成柴爿。劈柴爿又是体力生活，要寻一把废旧菜刀,端张小矮凳摆勒天井里，定定心心坐下来,摆开战场“辟里啪啦”劈伊一大堆。要是侬死样怪气勿卖力，家主婆从窗口伸出枯榔头噜里八苏啷起来哪能吃得消!伊再勿管侬是教授还是专家、学者，辣老婆眼睛里侬就是个“喂”。勿客气眼，喊侬一声“杀千刀”，侬准备哪能！
生煤炉还是个脑力生活。勿要当生煤炉便当来西，勿动脑子还生勿着煤炉唻，连每日天生煤炉个老阿姨有辰光也会老鬼失撇。要是侬第一趟生煤炉呒没隔壁邻舍帮忙，保证侬会拨烟灰薰得眼泪鼻涕嗒嗒滴，望仔迭只介触气个煤炉哭勿出佬笑勿出，恨起来真想撩起一脚拿伊踢翻脱。
生煤炉还要具备八大件,引火煤球、煤球、废纸头、自来火、火钳、扇子、再加一把劈柴刀。弄得好比外科医生，像煞有介事。
不过，闲话讲转来,上海每条弄堂早浪生煤炉,也拨上海带来了烟火气。弄堂里，一排生有好几只煤炉好像古代个烽火台，烟雾弥漫,火星乱飞。一班阿姨搭仔赤膊爷叔手拿扇子,还要来辣炉门边上劈里啪啦拍几记,好象做生煎馒头个师傅来辣锅沿浪总归要得意个用铲子敲几记。上班个小姐刚跨出大门，一看阿姨爷叔要用扇子敲煤炉了,就会豪扫抽出绢头，挥挥烟雾，扪牢鼻头，扭几记腰肢，三脚两步逃出弄堂。搿辰光,生煤炉个外婆、阿娘总要勒屁股后头关照一声：“囡囡，早眼回来噢!”“晓得来!”
等到上班个先生小姐统统走脱,挺下来个就是一班阿姨、阿娘、太公、好婆搭仔一帮小捣蛋。乃末肆无忌惮了，有个劈柴爿,有个用扇子拍煤炉,外加柴爿勒煤炉里烧起来个“哔剥”声,火趁风势个“呼呼”声,烟雾到处弥漫,当中还夹着女人们大呼小叫: “张阿姨,快点,扇子借来用用!”“黄家姆妈,小菜买来啦?”“喏,买条咸黄鱼!”“阿七头,帮我去拿把火钳!”“阿唷,呛煞来!眼泪水侪呛出来了!”上海弄堂早浪个烟火气，加上外滩轮船个汽笛声，让上海滩生机勃勃。
讲到生煤炉，弄堂里还出了一桩大新闻。五号里个张家囡囡每日天早浪总归来辣弄堂里生煤炉。张家囡囡生得黑里俏，交关秀气，生煤炉个动作邪气嗲，连女人看了也要气喘心跳。七号里个小白脸老早就看相黑里俏了，伊每日天上班存心从囡囡个煤炉边浪走过，还要停下来搭讪几句。有一日天，小白脸又来茄山河了。张家囡囡讲：“阿拉煤炉坏脱了，生来生去生勿着，侬勿帮我忙，还要来看白戏！”啥人晓得第二天一早，小白脸居然拎了一只赤刮勒新个煤炉送拨小姑娘，还顺便拿伊个旧煤炉掼勒垃圾桶里，弄得张家囡囡激动了好几天。后首来个事体就用勿着谈了。结婚搿天闹新房，一个捣蛋鬼想出个节目，要新娘子拿煤球勒勒小白脸面孔上搨得墨墨黑，新娘子拨大家捉弄得面孔黑里透红，红里透黑，好像烧红个煤球。婚礼主持人一本正经上来发言：“现在媒婆身价勿及煤炉，十八只蹄膀还勿及十八只煤球。”
搿辰光，上海弄堂个烟火气，侪靠煤炉柴爿加蒲扇。
作者
朗读者
往期回顾：
图：网络 / 编辑：渺渺