邻居（一）
讲述：施陈骅
作者：江上
沪语改写：荣梅
讲述：施陈骅
有一日，我落班回到屋里。一歇歇功夫，家主婆也回来了，一进门，就朝我喊：“老公……老公，我碰着一桩有趣个事体！”虽然还勒勒吭，却是一面孔个笑容。老婆一只手拎好准哦仔包，一只手拎仔一袋白馒头。我接过伊手里向个物事，摆勒台子高头，让伊慢慢叫讲。
“老公，侬讲有趣伐？我到了阿拉楼下去停电瓶车，刚好碰着车库勒阿拉隔壁头伊个女个，伊也下班回来，我笑眯眯朝伊点点头，伊也搭我打招呼了：‘下班啦？’我没啥闲话回答伊，看见伊手里拎仔馒头，就顺口讲：‘买馒头啦？蛮好个嘛。’没想到，伊一听，就硬劲要拿馒头送拨我。我哪能好意思拿啦，但是伊反反复复讲，搿馒头是伊拉单位个食堂师傅自家做个，味道勿错，吃仔也放心。我还是推辞，伊急了讲：‘一塌刮子5块洋钿呀，拿勒海拿勒海，尝尝味道呀’，硬劲塞拨了我。让我勿晓得讲点啥好了。老公，侬讲有趣伐？——我连伊姓啥叫啥、住阿里幢楼也侪勿晓得个呀……”
家主婆有眼兴奋、还勒勒唠叨。我对搿位女士有眼印象个，之前我开电瓶车进出车库个辰光，也碰着过几趟——四十几岁个年纪，剪短头发个。我搭伊也是彼此照面点过头而已，从来也呒没打过招呼。老婆讲伊拉两家头也只不过是偶尔碰着讲两句“下班啦？”或者“出去啊？”搿能个交情。再看看台子浪个白馒头，我开始觉着蛮难个了。“无功勿受禄”呀，再讲阿拉之间根本呒没啥个交情个。中国人讲究“礼尚往来”，“来而勿往非礼也”。葛哪能办呢？
也勿晓得从啥辰光开始，阿拉已经习惯了“勿搭陌生人讲闲话”，“关进小楼成一统”，就是住勒对门个邻居，也常庄是“老死勿相往来”。对搿个。大家好像侪已经习惯了，觉着老正常个，生活原本就是搿能个嘛。但是今朝，勒勒“陌生”个邻居之间，发生了搿能介一桩事体，还真是有眼“有趣”个。
突然之间，老婆讲：“哎，老公，阿拉勿是有个亲戚勒勒经营农家乐个嘛？下趟我碰着伊，问问伊需要草鸡、草鸡蛋伐？假使需要，阿拉下趟就帮伊带眼来好唻！”我认为可以个。讲：“葛么，阿拉就尝尝搿个馒头？”伊也点点头。馒头还是热个，馅子是老卜丝个，斩个老细个，味道调得邪气好，下班回来，搿个辰光，好吃个。
往期回顾：
图：网络 / 辑：渺渺