阿拉去看戏 / 开普饭

沪语朗读：洪瑛

朗读者

阿拉去看戏

来源：新民晚报作者：郑自华沪语改写：丁迪蒙

朗读：洪瑛

上海人欢喜拿看电影以外个观剧侪称作看戏，看越剧、沪剧、京剧是看戏，看评弹是看戏，看话剧也称为看戏。话剧是舶来品，中国初期话剧勒内容搭仔形式浪侪有别于旧戏，所以拨称为“文明戏”。勒上海，看电影是比较亲民个消费，价钿便宜，屋里附近随便寻家电影院就可以了，相当于饮食当中个便餐；个么看戏就相当于是正餐了，一来是看戏价钿比较贵，二来嘛，看戏比较麻烦，剧场一般侪勒市中心个。搿两年来，随牢文化市场个发展，欢喜看戏个人是越来越多了。

我也成为了欢喜看戏个一份子，我看过话剧《复兴号》、《徐光启》、《再见徽因》，看过京昆未来式《天上人间李后主》，看过中篇评弹《蒋月泉》、《上海老歌演唱会》、音乐剧《摇滚学校》，也看过朱宗庆打击乐团个《木兰》。我看个搿些戏，有个是赠票，更加多个是自己花铜钿买个。

今年1月，朋友相邀到人民大舞台去看《杨门女将》，搿是一部青春版个大型秦腔历史剧，由陕西戏曲研究院个学员培训班演出。《杨门女将》个剧情是家喻户晓个，但是是上海人勿熟悉个秦腔，更何况，演员又是一群学生子，我实在有点“懈门相”。但又怕拂了朋友个好意，盛情难却，只好勉强为之。

我是属于勿入戏就要走神，就要打瞌充的伊种人。啥人晓得整整两个多钟头，我是全情投入，整场戏拨我有眼前一亮个感觉。原来阿，秦腔历史悠久，有得上千年个历史，堪称国宝。搿部戏个演员虽然年纪轻，却是充满了朝气，而且艺术功底扎实，嗓音高亢响亮，可圈可点，几位主角，有个扮相端庄，音调高昂，字正腔圆，铿锵有力；有个扮相俊俏漂亮，唱、念、做、打全面，英姿飒爽；有个以其精到个武打表演，高难度个翻跟头，拨观众留下了极其深刻个印象。演员自然是邪气卖力个，我从望远镜里向看过去，只看见年轻演员个面孔浪向侪是汗，演得十分投入，一点也勿懈怠。另外，剧团舍得花本钿，不管是主角还是配角，几十个人物个服饰邪气华丽，五彩斑斓，因为是古装戏，所以行头让人也眼前一亮，赏心悦目。搿眼学员个一丝勿苟、精益求精、青春靓丽、英气逼人个演出，赢得了全场观众经久勿息个欢呼声、叫好声。演出结束，还特地安排了剧团领导搭观众见面，领导介绍讲：作为小剧种个秦腔能够勒上海迭个大码头演出，机会难得，所有个演员都老珍惜，有个演员身体勿好，勒发烧，还坚持“轻伤不下火线”，剧场再一次响起了经久勿息个掌声。

勒刚刚闭幕个第十二届中国艺术节期间，全国各地有得51台大戏勒上海演出，我还看了河南豫剧、上党梆子咾啥好几部戏，领略了地方戏曲个风采搭仔魅力。整个艺术节期间，达到了十万观众进剧场、百万观众勒现场、千万观众勒线浪个空前规模。

于是，去看戏，就成为了上海市民生活个重要组成部分了。