半篮秋色
沪语朗读：周红缨
作者：吴翼民
沪语改写，朗读：周红缨
勿知勿觉个辰光，秋天就到了阿拉个面前，又勿知勿觉个，秋天拨阿拉带来了邪气多个礼物。秋天带拨阿拉个礼物勒阿里呢？
秋色渐生篮先知，——一只平平常常个竹篾编个篮头，眨眨密密个小眼睛，无声胜有声：我晓得秋天勒阿里个，勒田野里、勒树浪向、勒水里向……然后，就全部聚集到了农贸市场里。搿只小竹篮是好多年前特为从马路浪一个浙江大嫂搿搭买来个，搿个浙江山里进城个大嫂挑仔满满一大担竹编器具进城来卖，人清爽、货也清爽，于是就吸引了交关人来买，我看伊个竹笾搭篮头编得邪气精致，就各要了一只，竹笾可以摆馄饨饺子，竹篮头可以到农贸市场去买菜。后首来，竹篮头派用场个机会勿多，出门个辰光常庄忘记脱带伊，让伊一家头孤零零个挂勒房间个角落头里叹气，——现在带竹篮头出门买菜个几乎呒没了，我假使带伊去，勿是就变成功了另类？但是到了秋天，我就再也顾勿得啥了，果断个带仔迭位清秀个“竹夫人”到市场去赏了秋色，唯有此君个风雅可以匹配秋景唻，假使带了塑料袋去购物装秋，就老煞风景了呀。竹篮载秋是最合时宜个，竹篮载秋秋更清。迭个辰光，田野里个秋邪气丰盈，最欢喜个就是珍珠米了。有句戏曲唱词：“但等到八月秋风起，棉花喜笑、高梁脸红、玉米怀胎把腰弯”，珍珠米怀胎沉甸甸个弯下了腰。苏州人拿伊叫作“豫麦”，可想而知伊个娘家是中原，像中原人一样个厚实；上海人叫伊“珍珠米”，玉白、朱红，每一粒侪精美得讨人欢喜。就先装进竹篮头里带回去应了秋景再计，何况现在拿伊封为“五谷杂粮”健康食品，就更加出风头唻。
想想小辰光，初秋吃珍珠米就是一大景致，剥开个珍珠米棒现煠现吃，香糯耐嚼，剥下来个玉米须粘勒下巴浪就像是是戏曲老生个胡须，小囡最欢喜妆扮成一个关老爷，演一出过“五关斩六将”个威武大戏。
树浪向也有秋啊，大多数个水果侪应仔秋风召唤而来，海棠果青苹果脆梨然后就是柿子橙子橘子……啥个侪想装进竹篮头，但是装勿进介许多个秋呀，突然之间就瞄上了火红个柿子，对了，就是迭个像红灯笼一样柿子了呀。有一则谜谜子：“红漆马桶黑漆盖，十人见了九人爱”，谜底就是柿子，拿伊比成功马桶，好像有点低俗，伊也乐意，勒柿子个故乡到处可以看到，农家个院子里也常庄种个一、两棵，秋风一吹，伊就羞得满面孔通通红，酿足了蜜甜，真是价廉物美。小竹篮喜孜孜个接纳了伊。至于水里个秋也勿含糊个，除脱仔大闸蟹、水晶虾以及各种经秋而肥个鱼类，号称“水八仙”个菱角莲子雪藕茭白搭仔鸡头米等也是手拉手精彩登场。竹篮头一眼就看中了有“水中人参”美誉个鸡头米。相比“珍珠米”，鸡头米更加像“珍珠米”唻。水乡个农民从立秋就开始了收采鸡头米个辛勤劳动，搿个水啊，烫得田鸡翻肚皮，但是农民就勒勒搿水深火热当中挖取一只只“鸡头”，还要剖开，像剥石榴一样，绽出处子乳头状个胭脂果，剥开伊个外壳，再露出洁白个果肉。我曾经勒鸡头米个故乡亲眼看到农民拉个辛劳，更加感受到鸡头米个珍贵，伊个清香糯甜饱含了水乡农民多少个心血汗水啊！想到搿搭，我对所有秋天个礼物侪更加珍惜，——秋天分娩于酷暑，秋天凝结了人们个心血搭仔汗水！既然秋天是介珍贵个，我就小取半篮秋色足矣，谓之识秋，惜秋。
往期回顾：
图：网络 / 朗读 & 编辑：渺渺