隔代欢喜
沪语诵读：和沁
作者：高汉良
（新民晚报上海闲话2011年5月31日）
辰光过得真快，阿拉小外孙囡是日长夜大，快三岁半了。
人家讲“隔代欢喜” 倒是有眼道理，现在我假使几天勿看到伊，真是难熬刹脱，“肚肠根”也会痒格。
想想蛮怪格，囡吾小辰光，我倒无没迭能噶，搿格辰光自加年纪青，又辣部队当兵，囡吾由丈母娘一脚落手带大。讲难听点，我迭格做爷格，连块“书布”也勿呈汏过，勿是囡吾勿欢喜，就是寻勿着现在对小外孙囡格感觉。
八十年代中，阿拉住辣老西门埃塔，囡吾只有四、五岁，每格礼拜要乘24路电车赶到汾阳路依面格音乐学院学钢琴。老师布置作业，回来每天要弹两格钟头以上。有一次囡吾勿肯弹钢琴，横讲竖讲，勿听，气得我“眼眉毛”弹起来，一把奈伊举起来，恨勿得要掼出去……
老婆急刹：“侬阿是昏脱啦？”
我一看，格辰光阿拉丈人阿爸、丈母娘、大舅子、小舅子，一个个象保镖一样瞪牢仔眼睛看我，晒过庙里相大雄宝殿前头格“四大金钢”一样……
其实，自家囡吾哪能舍得掼啊？我是重重举起，轻轻掼辣傍边沙发浪向而已。格叫“虎头蛇尾”，一场虚惊。屋里相众人才纷纷散去。
不过，搿种摆摆“牙人头”个做法，放辣现在小外孙囡身浪，我也是勿舍得格。
俗话说“三岁看到大”，我老婆要比我理性，有常时小人勿听，伊倒要教训两句，我辣傍边听到“火药味”浓了，浑身勿适意：“小人勿懂，侬勿要对伊介凶好伐”，迭格辰光，阿拉小家伙眼睛马上望牢我，象“讨救兵”一样。
小外孙囡是我格“掌上明珠”，退休生活有了伊，真是丰富了交关。不过有桩事体我有一点点“想勿通”，我对小家伙百依百顺，伊滑稽伐，反而以“冤”报德。
上次伊勿肯吃饭，外婆讲：“囡囡勿吃饭，下倘无没人欢喜。”
囡囡讲：“外公欢喜！”
外婆：“外公欢喜坏小人不对，囡囡要做坏小人吗？”
“囡囡做好小人！外公坏，囡囡好！” 小家伙边讲边朝仔我瞪了一眼，还张大嘴巴等外婆喂饭 … …
喔肴，觉倒！外公拔侬觉倒！
拿讲，好白相伐？格就叫“隔代欢喜”。
呵呵，热慕当有趣。
往期回顾：
图：网络 / 编辑：渺渺