好吃个“大闸蟹”
来源：新民晚报
作者：许德华
诵读：黄燕琼
蟹勒江浙沪个菜谱里向是花头最浓、腔势最足个“大亨”。
“蟹”个名字一开始就蛮弹硬，据说老里八早有蟹勒水田里向横冲直撞，种田个老百姓想了交关办法侪勿能对付伊个刁钻促掐，只好叫伊“夹人虫”。后来有一个叫巴解个人拿蟹赶到一筑堆，再拿开水去浇，“夹人虫”拨烫得外壳发红，一股香喷喷个味道传了开来，伊尝了一口，发现味道邪气好！“夹人虫”从此就成了一道好菜。后来就勒勒“解”字下头加个“虫”字，拿“夹人虫”称为“蟹”了。鲁迅先生讲，第一个吃螃蟹个人是勇士。
至于“大闸蟹”搿种称呼个由来也有好几种讲法。一种讲法是苏州卖蟹个人叫出名个。当时辰光伊拉常庄勒下半日挑了担子沿街叫卖，叫卖声就是：闸蟹来大闸蟹。其中个“闸”，音同“煠”，即隔水蒸。另外一种讲法是，捉蟹个人往往会勒勒港湾个地方摆一道竹编个闸门，夜到拿闸门拉起来，再放只油盏灯，蟹看见火光，就会搭爬到竹闸浪拨一一活捉。块头大个蟹就拨称为大闸蟹。搿种讲法倒是搭上海个简称“沪”个来历差勿多：沪，沪簖，一种竹编个捉鱼工具。
小辰光看见市面浪卖个大闸蟹侪是用草绳扎成功一串串个，装勒勒竹编个蟹篓里向。卖蟹个人计算价钿既可以称分量按斤买，也可以数只头论只买。邻居阿姨贾丽卿欢喜吃蟹，假使看到伊下班回来手里向拎仔一串大闸蟹，我就晓得有口福了。贾阿姨待我邪气好，我第一次品尝清蒸大闸蟹就是贾阿姨请客个。等到贾阿姨配好生姜末、砂糖搭仔酱油做个佐料，阿拉一面吃一面茄山河。蟹个外号“横行将军”、“无肠公子”咾啥就是从伊搿搭听得来个。
读大学个辰光，礼拜六中浪向，学生食堂有辰光会搭有煠好个大闸蟹卖，一块五角一只，价钿勿便宜，但我还是会搭买几只带回屋里，叫来贾阿姨一道“喳”个开心。
有一腔大闸蟹成了“天价蟹”，蟹吃得少了，但是报刊杂志浪写蟹个文章倒是多了起来，乃末懂了“大闸蟹”个来历，还有古代文人写个有关大闸蟹个诗词。譬如“形模虽入妇人笑，风味可解壮士颜”就描写了大闸蟹个卖相，看看是有眼好笑个。“一手正宜深把酒，二螯已是饱经霜”写出橘黄蟹肥辰光吃蟹人个开心。据说有个老吃客吃好蟹以后还可以拿蟹壳拼成完整个蟹形，觉得邪气稀奇。
苏东坡一生波折但伊活得通透：不到庐山辜负目，不食螃蟹辜负腹。伊情愿“一诗换得两尖团（螃蟹，古称尖团）”大闸蟹味道好，顶脱啦！“秋风起，蟹脚痒”，夏去秋来，一年中最好吃个大闸蟹又来了，走，扳老酒、吃大闸蟹去！
丁迪蒙 & 黄燕琼
往期回顾：
图：网络 / 编辑：渺渺