父亲100岁了
朗诵：曹凯
父亲100岁了
周小甬
今朝是去医院陪护父亲咯日脚。
推开病房咯门，里厢安安静静咯，只听到吸氧机“咕嘟、咕嘟”冒泡咯声音。
我轻手轻脚走到病床前，父亲睏着了，难以合拢咯嘴巴一张一合，显得十分安详。
眼门前咯老父亲，伊睏勒了自家咯梦里厢，伊咯世界已是一片混沌！
望着父亲清瘦咯脸孔，我再一次问自家：伊曾经是跟日本鬼子英勇作战咯新四军战士？伊曾经是南征北战陈粟大军中咯解放军干部？伊曾经是跨过鸭绿江咯20集团军咯志愿军军官？
是咯，就是我迭位苍老咯父亲，从抗日战争打到解放战争，从淮海战役、百万雄师过大江、战上海，一直打到全国解放。
父亲1919年3月出生咯，再过几日就是伊100足岁咯生日了！
人，真咯不可思议，一位血气方刚咯年轻战士，一位威严刚毅咯解放军军官，老了咯辰光也像普通咯老人一样，完全呒没了钢铁一样咯身躯，也阿呒没了我记忆中咯英雄气概。
护士拿来了体温计，父亲醒了，伊望着我微微一笑：侬是阿拉屋里厢咯人，侬咯名字我想勿起来了。伊有眼勿好意思。过仔一歇歇：哦，我想起来了，侬叫小甬。
我老开心咯，伊逐步退化咯大脑对我还是有眼记忆咯。
护工小慧告诉我，伊现在不肯剪手指甲了，一面讲一面去拉伊咯手，只听得父亲大叫了一声：勿要弄。咯能虚弱咯身体，哪能会发出嘎响咯声音，中气十足咯。
小慧看牢我咯眼睛讲，我呒没骗侬伐。
我来试试看。
父亲咯耳朵有眼聋，眼睛倒蛮好咯。我勒了手机上写了几个老大咯字：剪指甲，讲卫生。
伊一边看一边认真咯读，人马上安静了下来，我轻轻交帮伊剪起了指甲。一只手指头，两只手指头，剪到第三只手指头咯辰光，伊讲闲话了：好来，不要剪了，有眼痛。我又勒了手机上写了几个字：侬顶勇敢了。他看了一眼手机点点头，一声也勿响了。剪好一只手指头，我就向伊伸伸大拇指，他咯表情老骄傲咯，老人真咯搭小人一样，要人表扬咯。勒了勇敢精神咯鼓励下，我顺利完成了“光荣而艰巨”咯任务。
接下来到了上课咯辰光了。为了提高伊咯思维能力，我编写了语文课程和数学课程。
语文课，我勒手机上写：抗日战争、打鬼子、解放战争、华东野战军、抗美援朝、志愿军……
伊像小学生一样，非常认真咯朗读，口齿不清爽咯辰光，我就让伊重新来过，读得好咯辰光，我会得摸摸伊咯额骨头表示鼓励！
数学课就比较简单了，伸出几只手指头让伊数数，伊数得老认真咯，从来也勿会数错咯。
上好课我用手摸一记伊咯眼睛，他就乖乖交闭上眼睛休息了，像一个老懂事体咯小囡。
伊安静了，我就坐勒伊咯身边静静交想心思：下乡咯辰光，每趟侪是伊请假送我、接我。十六铺码头咯出口处，老远我就看到伊了，伊接过我肩胛上咯扁担，挑起几只旅行袋走勒前头，伊咯脚步斜气有力，我要跑步才能够跟得上……
再看一眼我咯老父亲，伊就像一盏油灯，灯盏里咯油已经少得可怜了，但灯草上咯火苗还勒了努力咯闪着光，多少顽强咯生命力！
父亲90岁了，每日天去九子公园打太极拳，几十年咯功底扎扎实实，伊搭我讲，我能活到100岁，你相信伐？
父亲92岁了，伊推开我搀扶伊咯手，也不要准备好咯拐杖，努力保持着雄赳赳咯军人姿态。
父亲94岁了，运动器械上拿脚翘得老老高，我劝过伊，伊不听。
父亲95岁了，9月份咯辰光收到了抗日战争70周年咯纪念勋章，伊拿了勋章挂勒了胸口头，老神气咯搭我讲，个是国家发拨我咯。
勒了陪护父亲咯搿些日脚里，最让我宽心咯是，伊身上没啥病痛，只是人老了，各个器官侪老化了。
最让我宽慰咯是，伊活到一百岁咯愿望马上就要实现了，实际浪向按中国人阴历咯算法，过仔春节伊已经是101岁了！
2019年3月
往期回顾：
图：网络 / 编辑：渺渺