上海人个几碗汤
今朝蛮冷个，怪不得埃歇辰光外婆老是讲：冬冷不算冷，春冷冻煞昂！最近我一直勒辣回想，老早上海呒没空调搭仔火炉，整个冬天阿拉是哪能捱过来个。好像天冷也就是穿得厚一点，面孔浪搭仔手浪搨一点蛤蜊油，夜里向勒被头筒里放只汤婆子、热水袋或者盐水瓶，当然也有同学手脚侪生满冻瘃，肿起来象馒头，甚至豁开口子流血水……
上海人会过日脚是出名个，天气再冷阿姨、姆妈自有办法应付。最令我难忘的就是每天喫夜饭，外婆一定会勒喫饭台子当中放一只砂锅，里向有火热达达滚的各种热汤：大白菜开洋豆腐汤、黄豆猪脚爪汤、罗宋汤、咸菜大黄鱼汤、排骨萝卜汤、扁尖老鸭汤、蛋饺线粉汤……喫好饭每人喝一碗热汤，浑身微微出汗——真是适意！
当年勒厂里做学徒工，一个月赤膊工资十七元八角四，外婆勿要我交饭钿，葛佬袋袋里总归有点小铜钿。冬天个下半日，厂里四点钟下班，乘“11路电车”（走路）到江苏路愚园路口，大约四点半多一眼，中浪向十一点钟喫个中饭老早消化忒了。新兴食堂门口飘出来的各种香味，我馋吐水也屏不牢，两只脚就像拨人拖进去了。一般我会勒油豆腐线粉汤、双档，搭仔鸡鸭血汤当中选一样，再加一咸一甜两只蟹壳黄。
只看见食堂里的老师傅，拿一只大铁桶架勒炉子浪烧，里向有鸡壳落，海蜒搭仔大把大把的葱，搿镬子鲜汤一大老清早就开始笃起来了，整个店堂里向温暖如春。汤面浪翻滚着几只油豆腐搭仔油面筋塞肉，两捆像春卷一样的薄百叶包肉竖勒哒哒滚个镬子里向一道烧。一捆百叶包估计有十只。铁桶的沿口浪挂了三四只铁丝网兜，有人点油豆腐线粉汤的辰光，师傅当场拿发好的线粉放进网兜，勒哒哒滚个鲜汤里烫热。一碗热汤加一兜粉丝，三四只油豆腐，撒点葱花搭仔五香粉，成就了大名鼎鼎的油豆腐线粉汤。假使想吃鸡鸭血汤也是如法炮制，只是拿油豆腐搭仔线粉调成块状的鸡鸭血。
讲起“双档”，蛮有趣个，伊名称里虽然呒没汤，其实也是一碗汤。海派文化受苏州地区的影响非常大，上海人历来欢喜听苏州“评弹”，而评弹艺术当中有独一无二的男女搭档的形式，称作“双档”。市井饮食文化当中就借用搿叫法，拿一碗汤里向，同时摆勒两只油面筋搭仔两只百叶包就叫伊拉为双档。但经常碰到女顾客胃口小，只需要一只油面筋搭仔一只百叶包，店家顺势而为，拿一只油面筋加一只百叶包叫作单档。上海滩浪的大众点心就汤而言，油豆腐线粉汤是嘀嘀呱呱的老大，鸡鸭血汤和双档排名老二搭仔老三。
外面冰天雪地，冷得要命，走进热彤彤的店堂，一碗有内容的鲜汤加两只“蟹壳黄”喫勒肚皮里，既解饥又驱寒，还不至于影响到夜饭胃口，真是一举多得。手挑店堂棉门帘走到江苏路浪，寒风还是介冷，气温还是介低，但是我一点也勿抖嗦嗦，额头浪还冒出一层细细的汗珠珠。
天慢慢黑下来，一过了夜饭市头，点心店搭仔食堂侪关门了，因为明朝一清早还要开门做早点生意。埃咯辰光，勒避风的上街沿角角浪，搭出来一只棚棚，蛮大一块案板浪放勒一排，拨火烤得墨赤铁黑的搪瓷小镬子，里向有各种已经烧熟的汤料——黄豆猪脚爪、大白菜豆腐、青菜猪肚、牛肉粉丝……只要加上鲜汤，放勒炉子上一滚就可以喫了。一对夫妻围着炉子张罗，下中班的工人路过，大多数挡不牢肚皮饿身浪冷，侪会坐下来吃一镬子热气腾腾的“砂锅”。上海人拿这种夜排档的小搪瓷锅叫作“砂锅”也是习惯成自然，因为每家每户侪用砂锅烧汤，而砂锅是最难服侍，一不当心就烧豁忒了。家里烧汤侪用砂锅，所以外面的小汤锅就顺口叫成小砂锅了。
俗话讲：穷，穷勒债里，冷，冷勒风里。上海冬天的风最冷，因为空气湿度大，吹勒面孔浪象刀割，当然有一碗热汤喫下去就不一样了。假使呒没条件，喫一碗热的菜泡饭也可以，有买烘山芋，捧一只勒手里向还要赞！
各种热汤，烘山芋，热菜泡饭，热烂糊面，热面疙瘩侪是上海人抵挡寒潮的另一路智慧！
朗读者
往期回顾：
图：网络 / 编辑：渺渺