【收納攻略】7個收納App 幫你更有效執屋

家居收納係一項持續性長期任務，即使你屋企有工人姐姐幫手，你都少不免需要自己落手落腳去做分類、歸納、取捨等工作。坊間有好多適當嘅收納工具，以及各種收納方法同心得，都可以幫你事半工倍，其實而家有好多手機App都可以幫到手！

手機App 如何幫你收納？

一般香港人家居面積有限，因為要用盡每一寸，所以家中都會有好多奇形怪狀嘅收納空間，例如床底櫃、衣櫃頂、暗格之類。當大家將物品收納之後，隔一段時間想搵番某樣嘢出來就頭痛了！到底嗰樣嘢放咗去邊呢？

如果你有租用迷你倉，同樣嘅情況亦會出現。將物品放入倉時往往係Pack妤一箱箱，一旦要搵番某件物品出來時就麻煩了，究竟喺邊個箱呢？

以下介紹嘅大部分手機App都係針對所謂物品整理，可以幫助用家記錄自己屋企有啲乜嘢、放喺邊度，甚至有提醒保用期、雲端分享等功能。善用呢啲App，絕對會對你嘅收納工程有極大幫助。

以下係一啲坊間常用收納手機App推介，不妨根據自己嘅需要，先試用免費版，覺得順手合用才考慮購買付費版。

1）Sortly

版本：iOS、Android

Sorty將物品管理視覺化，你可以在收納時一邊為物品影相、掃Barcode、輸入說明及擺放位置、加上Tag等，之後要搵番某件物品嘅位置，完全冇難度。你仲可以幫有保用期嘅物品標明日期、價錢，同時Scan埋保用證同單據。留意免費版只可以記錄100項物品。

2）Magic Home Inventory

版本：Android

呢個App利用「屋企／房間／物品」由上而下嘅架構去幫你整理、記錄物品，而且可以向下無限延伸，即係「房間」之下可以再設定不同嘅「櫃」、「箱」，甚至「櫃中有箱」，令物品位置更加清晰。無論係搬屋裝箱時用，或者配合迷你倉用，都十分方便。

3）Memento Database

版本：Android

呢款App本身並非針對家居物品．可廣泛應用於任何資料整理，但用嚟做收納App一樣冇問題。佢勝在有幾千種範本，唔難搵到一個可以適合做家品管理。你可以用顏色分類，並自定欄位為物品輸入各種資料，而且仲可以搜尋、篩選，匯出做Google Sheet，或儲存到雲端同家人分享使用，又有Desktop版本可配合做整理，實在有無限可能性。注意免費版嘅雲端儲存空間只限50MB。

4）Nest Egg

版本：iOS版

Nest Egg讓你利用掃描Barcode快速建立收藏品清單，可為你自動輸入產品資訊，最適用於影碟、書本、紅酒等等，當然亦可以手動輸入、編輯物品資料，仲可以設定保用資訊及續保提醒，每件物品可以拍攝多達10幅照片。用AirPrint或Email可以匯出物品清單作列印，簡單方便。付費只是一次過（US$4.99），唔使年年俾錢，都幾抵用。