蝸牛快遞（上）
沪语朗读：刘时医
朗读者
蝸牛快遞（上）
作者：谢玮洛（香港儿童文学作家）
改编：丁迪蒙
朗读：刘时医
小蝸牛，是害蟲，
光會吃，不會做。
天天背好小房子，
躲勒樹底睏懶覺。
“媽媽！”小蝸牛從媽媽个背後头鑽出頭來，仔細个聽搿老遠个地方傳过來个歌聲，老奇怪个問，“啥个是害蟲呀？”
“唔……害蟲，就是……”蝸牛媽媽皺起了眉頭，希望可以用比較温和个字眼去解釋“害蟲”个含意，“就是讲……只會得吃、白相，沒為大家做過点啥个事体。”
小蝸牛眼睛眨发眨发，伊從來也呒沒想過搿眼，呒沒想過要為大家做點啥。伊只頭低下来了，有眼難過：“我只得會吃，只会得白相啊？……我真个只得會吃，只会得白相啊……”
蝸牛媽媽用自家个觸鬚輕輕叫摸了摸小蝸牛个面孔，邪气溫柔个讲；“勿要難過！阿拉當然勿止會得吃，阿拉會得做个事体有交关唻。”
“真个啊？”小蝸牛个两只眼睛瞪圓了，有眼期待个問，“葛阿拉可以為大家做点啥呢？”
“呣，搿个……搿个要好好叫想一想个……”蝸牛媽媽拿頭縮到殼裏向去，自言自語：“搿个嘛，是要好好叫想一想个……”
從伊日天開始，小蝸牛就勿停个想，吃飯辰光勒想；走路个辰光勒想；睏覺个辰光勒勒想；縮勒殼裏向無所事事个辰光伊也勒想：“我到底可以為大家做點啥个事体呢？”
搿日天，小蝸牛無精打采个蹲勒屋裏。伊趴乐窗门前头，朝遠个地方望过去。藍颜色个天空，翠綠眼色个山峰，血血紅个花海，伊只覺着自家陷勒黑洞当中没啥办法可以掙脫出来。伊邪气沮喪，因為到現在，伊還勿晓得自家可以做眼啥个事体。伊想過叫做交关关种事体，比方讲做個農夫，拿鋤頭去種一大片个農作物，但是，伊又怕自家會得一邊種，一邊吃剛刚長出來个葉子，植物會得拨侪吃光，結果呢，啥个物事也種勿出来；去做個老師伐，拿好教鞭，邪气努力个去教書，但是，伊又覺着自家个學識不夠豐富，沒啥小動物願意做伊个學生；葛末，葛末，去做個文書……哦！勿来三，勿来三个！伊没办法想像自家戴好仔厚厚个眼鏡，昏头昏脑个拿只頭埋勒文件堆得邪气滿个台子浪……
“叮咚……叮咚……”小蝸牛还仍勒自家个苦惱里向，听到門鈴響起來了。小蝸牛懶洋洋个問：“啥人啊？”
“我是快遞，送快件拨侬个。”
呀！快件啊！小蝸牛用伊最快个速度滑到大門口去，打開门。
“我个快件勒啥地方啊？”
“呶，搿搭。”快遞員拿一只包裝得邪气精美个方盒子拨伊，“来，請簽收。”
小蝸牛快点接過方盒子，隨手簽了個字，然後呢，“啪”关好房門，就去拆盒头了。伊邪气小心个打開盒头……
哇！是草莓餅啊！是整整一盒头外婆做个草莓餅，餅浪向還有一張字條。小蝸牛拿起来輕轻叫读：“親愛个小寶貝，今朝是侬个生日呀，尔奶晓得侬最歡喜吃草莓餅了，所以做了一盒头拨你，祝侬生日快樂！想念侬个尔奶。”
“噢！是尔奶啊……尔奶……我也老老想侬个呀……”小蝸牛摸摸字條浪个字，眼门前有尔奶个笑容，还有尔奶轻聲轻气讲言话个樣子，伊心裏是邪气邪气感動个。
突然之间，小蝸牛叫了起来了，声音老大个：“對个呀！我可以去做个快遞員个呀！”對个，就去做快遞員……小蝸牛开始想像交关動物從伊个手里向接過快件个辰光个样子，心里向朕个是老老开心个，就像有一股暖流勒勒慢慢叫个流到了心里向去了……
点以下文字可以听到精彩回放：
图片来自网络