最呒腔调个“扫一扫”
沪语朗读：顾天虹
最呒腔调个“扫一扫”
来源：新民晚报夜光杯
作者：傅震
沪语改写、朗读：顾天虹
指导、推荐：丁迪蒙
真真呒没想到，勒最讲究腔调个“上海滩”，流行起“扫二维码”了，搿股风刹也刹勿牢。
老实讲，现在出门买物事，有三种支付方式：现金、刷卡、扫二维码，其中扫二维码是最呒没腔调个。
首先，语言就呒没“腔调”：“侬扫我还是我扫侬？”搿句闲话是定规要问个。顾客搭仔店家个关系就变成“扫来扫去”个关系了，还有啥个腔调？中国词语“扫”个第一要义是打扫。记得小学毕业升初中个考试，语文个作文考题是《记一次大扫除》。摆到今朝恐怕要改成《记一次扫二维码》了。可能“扫”自家也呒没想到现在“扫描”个用法要大大领先于“打扫”个用法了。
其次，是动作呒没腔调。到小山东水果摊去买了四只苹果。小山东看我摸出手机，就讲“侬头顶浪扫一扫”，我一抬头，两张二维码个纸板一绿一蓝勒头顶心荡发荡发，我豪扫眯起仔老花眼，点开屏幕对准仔蓝个一扫，问“26块，是伐？”挨下来呢，自家做账填写好金额以后，半秒钟勿到，一条干巴巴个命令过来了：“立即付款”。辣末生头喇叭里向勒喊：“支付宝收到26元”。再去看看小山东，伊已经勒勒招呼别个顾客。拎起仔塑料袋就跑，“扫”好了就呒没侬啥个事体了。啥人还来管啥人个腔调？
年纪大点个人，还是欢喜用现金去支付，真金实银捏勒手里向，比较牢靠。虚拟货币就好像是呒没货币，心里向空落落个，勿踏实。电影里向常庄有人捏仔一叠钞票勒手心里敲发敲发，蛮有腔调个。钞票在手，“老鬼勿脱手”，勿容易上当。
记得1992年个春天介，勒南非个约翰内斯堡街浪荡荡马路、茄茄山河，迎面走过来一个男人，有一米九十多，臂膀粗腰身是圆个，满面孔笑容。走到身边了，伊收起了笑容，张开两爿厚厚叫个嘴唇皮，伸出伊个一条又红又厚个舌头来。阿拉侪吓煞了，伊搿要做啥？伊招招手，又指指伊个舌头，阿拉再看见，勒伊个超长个舌头浪向，嵌了四、五颗大小相同个钻石，原来，伊是贩卖钻石个。伊个要价是二百美金一粒。邪气便宜个。长期勒南非生活个台湾朋友阿姚讲，钻石勿会是假个。我从袋袋里摸出了二百美金。伊要阿拉先付钞票，伊再拿钻石吐出来让阿拉仔仔细细看，我捏牢仔钞票，要伊先拿钻石吐出来。我心里勒想，假使我付了钞票，伊拿舌头缩回去跑了，葛末，再要去掰开伊个嘴巴是勿可能个。最终钞票还勒我个手里向，搿是现金交易个“老鬼勿脱手”个经历。迭个事体假使碰着刷卡或者是二维码扫，可能风险就会得大勿少。
要讲最有腔调个，还是刷卡。想一想，请了亲朋好友聚餐，酒足饭饱之后，服务员立勒椅子背后头轻轻叫问：“哪能结账”？“刷卡”。当侬从西装个马甲斜插袋里向抽出银行卡，用食指搭仔中指夹勒海，手一转，举到耳朵边，服务员邪气当心个接过去，用小个银盘托勒海轻轻叫退出去。一歇歇功夫，又拿账单搭仔刷卡个机器拿过来，仍旧轻轻叫讲，“请侬输密码”。密码是个人个，勒手指头个点触、飞动之间，拿侬个好客、豪爽个风采演绎得邪气完美。勿晓得啥人讲过：“腔调是一种享受”。
网浪一直有人勒传，扫二维码付款风险蛮大个，还举出了勿少“盗扫”个事体，吓得勿少老年人“扫”起来有点抖豁。但是，我自家或者周围个亲朋好友倒好像还呒没有过类似个遭遇。
我倒是亲身经历了一次刷卡个风险。十几年前头，有趟到瑞士琉森去旅游，勒家手表店里买了只表。当时是用信用卡支付个，只记得店家勒付款程序浪花了老长辰光。回来以后从第三个号头开始，连牢仔三次接到伊家店消费个记账通知，金额近千美元。我快点通知银行拒认，并出示了搿三次消费日期我没勒瑞士、而是勒日本个证明。最后，通过银行查证，完成了拒付。
现在，移动支付确实搭生活带来了交关方便，但也对传统个生活方式造成了勿小个冲击。对于人类来讲，勿要让新技术个使用，成为了造成富有人情味个、有腔调生活方式个一种追忆。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号