墙壁浪向个“甜言爱语”
来源：夜光杯
作者：龚伟明
沪语改写：边秦翌
沪语讲述：朱友好
从四川北路进到甜爱路，有得洋房，有得杉树，最最引人注目个风景，是墙壁浪向个“甜言爱语”。
下半日个辰光，橘红色个墙脚搿搭，有得两个穿仔校服个小姑娘寻到一小块空地方，其中一个稍微犹豫了一下，举笔写字，另外一位立勒伊后头，显然是陪伊来个。少女个字迹，就像伊个身材搭仔面孔，看上去显得邪气娇小稚嫩。
甜爱路朝南个一段墙壁浪向，有得廿多块镶成勿同形状个匾框。框里向有先秦《诗经》个关雎篇、近代诗人刘半农个《教我如何不想她》……还有柏拉图、莎士比亚个情诗……每一篇侪可以奉为经典，只是勒勒匾框个四周、墙壁浪向个空白地方，拨普通凡人“补白”了勿少情话。一垯路里朝北，墙壁浪向字叠字、句连句个“甜言爱语”老老多，低到墙脚，高到墙头，黑颜色个字比较多，还有白字、绿字、黄字、红字咾啥，有得直呼姓名表达爱慕之意、痴迷之情个，让看个人熬勿牢要笑出来。更加有一颗老大个红心，像煞是一把火焰映勒勒墙壁浪向，邪气大胆，直截了当。搭匾框里向个经典情诗比较，墙壁浪向个“甜言爱语”勿够华丽，有个甚至比较草率。假使讲拿经典情诗当作阳春白雪，搿眼“甜言爱语”只能比作下里巴人。甜爱路浪向爱情表述个档次，一南一北老老明显个。必过，下里巴人好像更加接地气。墙壁前头，有得好几个小姑娘用手机对牢仔“甜言爱语”勒勒拍照片。想起刚刚伊个穿校服个少女，勒勒甜爱路墙壁前头举笔写字，埃种朦胧之感，含羞之意，一定美妙得无与伦比。
夜快头，勒甜爱路搭仔甜爱支路个交叉口口浪，常庄有得三两对情侣勒勒红色爱心邮筒之前留影，温和个夕阳照勒海，小姑娘邪气美丽，男小囡邪气幸福。也有小姑娘一家头对牢仔蓝色甜爱邮筒自拍个。听说，情人节迭一天，到此地来拍照片是要排队等勒海个。
我想勿出埃颗老大个“红心”是哪能介喷到墙壁浪向去个？只好用“爱情个力量”来解释伐。有一日天，墙壁浪向冒出一行白颜色个大字：烧一辈子饭。虽然是缺主语个病句，但是可以猜想大约摸是某位大个男小人个简单告白。我曾经勒勒一档电视相亲节目当中，听到当事的青年男女讲“我烧饭伊汏碗”搿能个闲话，朴实个闲话让场面邪气温馨。根据记载，作家沈从文拨张兆和写了N封情书，张兆和勿为所动，却拨伊一句“让我迭个乡下人吃杯甜酒伐”个闲话打动了，看到伐，“撩妹”个技术越精简，“俘获力”就越结棍呶。日复一日，甜爱路到甜爱支路一垯路里个墙壁浪向写满了“甜言爱语”，称之为“情墙”也勿为过。
今年仲夏个一天，行人突然发现甜爱路名人经典情诗匾框周围整洁一新，原来凡人“补白”个情话已经一点也没有了，城管还张贴了“禁止涂写涂画”个警示牌。就算是“甜言爱语”，侬自说自话个“补白”名人雅士，当然就勿对称，甚至有眼勿恭敬了，终归脱不了“视觉混乱”个干系。
就算是“情墙”拨管理起来了，但是还勒勒继续伊个传说，照样有得年轻人流连忘返——甜爱路风景独到，自有魅力啊。
朗读者
往期回顾：
图：网络 / 编辑：渺渺