说说“上海话”
沪语朗读：顾敏
作者：郦帼瑛
沪语改写：顾敏
文字修正：丁迪蒙
勒中国，“上海闲话”并勿普及。
特别是现在个上海，筑巢引凤，海纳百川，一大批国内外个精英侪引进到了上海滩，讲个侪是“国语”或者是“英文”。就连得土声土长个上海人，侬搭伊拉交流也样一样个，用“国语”或者是“英文”对话，“上海闲话”逐渐变成功只有上海人自家相互之间交流个语言了。
不过，勒八十年代个辰光，“上海闲话”确实是让人“景仰”个。“阿拉”上海人，勒勒任何一只城市搭国家，眼神里向侪会得有眼骄傲个。
记得刚刚到上海工作个辰光，年底有得探亲假，我准备了各种上海特产，想拿转去孝敬爷娘。
同事跑过来热心个问：“侬啥辰光到乡下头去啊？”我觉着老奇怪，回答伊：“我没讲要到乡下去啊？”“咦，侬勿是讲要回娘家去个嘛！”“我娘家啊？勒城里向个，是市区。”“哦、哦、哦。”
还有一趟。邻居请我到屋里去做人客。拎了礼品进门个辰光，主人家刚好勒勒灶披间里忙，我就帮忙去摆台子搭仔碗筷。吃饭一共有7个人，但是椅子只有6把。
我就讲唻：“还少一只凳子哎！”
主人讲：“葛侬去寻只矮凳出来。”
我七兜八兜，屋里就迭眼地方，三分钟就兜光了，也木没寻到“矮凳”。“哦哟，侬哪能介笨个啦！矮凳勿是就勒侬个脚跟头啊！”“啊？搿只凳子？介高个哎！勿是矮凳呀！”我老惊讶个。
“哎呀，侬勿晓得个啊？阿拉上海人个凳子侪叫矮凳个。”
“哦——噢——”我恍然大悟，答应了一声。又勿免心里向勒想：“葛酒吧个吧凳有得介高，也叫矮凳？”
后首来，我尽管是学会了讲“上海话”，但仍旧习惯用“国语”来抒发情感。特别是对色彩个描述，更加是按照“国语”个规范，来恰当个运用。但是，“上海闲话”又有新鲜个说法了。
一日天，搭上海个同学聊起画图，当然免勿了要讲到“杂色班驳”个话题。乃闹猛唻！我讲“红艳艳”，伊讲“血血红”；我讲“绿油油”，伊讲“碧碧绿”；我讲“黄澄澄”，伊讲“蜡蜡黄”；我讲“白生生”，伊讲“雪雪白”；我讲“黑乎乎”，伊讲“墨墨黑”。反正，伊个“上海闲话”，就像“西名”，要搭侬侪倒转来，真是拿伊一点办法也呒没！
我问：“上海话怎么都颠倒说的呢？”
“告老好听呀，侬勿觉着啊？侬试试看，假使用上海闲话来讲侬个普通话颜色，有多少别扭啊！”
“哦——噢——。”我嘴巴浪向答应，但是心里又想，“你倒是拿上海话说‘婀娜多姿’、‘缠绵悱恻’试试？保管你将它说成‘阿奶多嘴’、‘睡眠非侧’，哈哈哈！”
往期回顾：
图：网络 / 编辑：渺渺