亭子间长脚（一） / 开普饭

沪语朗读：周恋云

亭子间长脚（一）

來源：書友會程介民

沪语改写：丁迪蒙

诵读：周恋云

长脚是一街二坊公认个才子，风流潇洒、英俊高大，人称伊亭子间长脚，又叫做说书先生，因为伊会得说书。长脚是苏州人，人和善谦逊，脾气像苏州闲话一样糯软温和，即使吵相骂听起来也像是勒谈情说爱。

伊上知天文地理、下晓阴阳八卦，言语性情哲理蛮多个，激昂起闲话来像是说唱。虽然有点娘娘腔，但是苏州闲话本来就是搿个调调，好听。空闲辰光欢喜一把椅子、一壶茶、一把三弦琴自弹自唱，吸引了弄堂里向个男男女女、老老少少，充实丰富了弄堂里每个空闲个夜到。

孩童时代特别喜欢听长脚说书，每日夜到侪是匆匆忙忙放脱饭碗头就搬只小矮凳跑到8号亭子间排排坐、听说书。听光以后还照伊个音调惟妙惟肖个学拨没听到个大人小囡，拿伊拉个胃口吊足，第二天就早点去亭子间里坐了。每天夜里有连续长篇身临其境个评书故事听，真个是一种高级享受，听长脚说书就成了石库门里茶余饭后个一桩最有韵味个事体了。

直至四十多年以后，一街二坊像交关老弄堂房子一样拨快速淘汰、拆迁，大家侪住进了高楼大厦以后，对曾经有过个弄堂生活个种种景观已经拨逐渐淡忘，但听长脚说书搿桩事体却是弥久不忘。老弄堂就像一首经典个老歌，大家会得忘记脱歌词，却勿会忘记伊个旋律。

长脚个老婆阿琴有个阿妹叫小芳，长得娇小玲珑、齿白唇红、袅娜多姿。是个美得男人也勿敢正面看伊个美女。当年小芳只有十七八岁，也是每天夜里向要听长脚说书个，勿知勿觉就欢喜了长脚，就搭姆妈讲，伊中意亭子间长脚。因为年龄比长脚要小十几岁，做娘个随便哪能也勿同意伊嫁拨长脚。几乎勒勒同时，阿姐阿琴也看上长脚，阿琴比长脚小八九岁，勿晓得啥个原因，母亲反对妹妹小芳跟长脚相好，却同意姐姐阿琴嫁拨长脚，拿一对郎才女貌个才子佳人硬劲拆开来，演了一出现代版个姊妹易嫁个闹剧。

长脚孤身一人从苏州到来上海打拼，是一家工厂个技术员，评弹说唱只是伊个业余爱好，勒上海，伊是举目无亲个，当然邪气乐意讨个上海姑娘做老婆。伊是一个邪气传统个男人，只想要讨新妇生小人，传宗接代，平平淡淡、安安稳稳个过日脚。但是，老婆阿琴结婚以后好几年没生育，虽然是淑德贤惠，但勿孝有三、无后为大，长脚急病乱投医，到处去请江湖郎中来把脉看，阿琴还是一潭死水，毫无动静。

妹妹小芳也到了少女怀春、情窦初开个年纪了，勒母亲个撮合下头，嫁拨了一个厂长。勿久有了个小囡，厂长个工厂整个搬到贵州去了。小芳留勒上海，既要工作又要带儿子，支撑一个屋里邪气艰辛，阿姐、姐夫就拿小囡接过来当做自家个悉心抚养。小芳也就常庄借宿勒勒阿姐个屋里，一来、二去搭长脚个情意复萌、暗火又燃，勿晓得是姐夫上了小姨子个床、还是小姨子上了姐夫个床，小芳搭长脚生了个囡儿。长脚开心得呒没办法形容，自弹自唱了一首开篇、清朝人张问陶个《二月五日生女》：

自笑中年得子迟，颠狂先赋弄璋诗。

那知绣榻香三日，又捧瑶林玉一枝。

事到有缘皆有味，天教无憾转无奇。

女郎身是何人现，要我重翻绝妙词。

长脚搿个辰光个心情搭张问陶喜添千金个心情是一模一样个，但是，张问陶只是为了弄瓦之喜而赋诗作词，长脚却是得意忘形而填曲弹唱，以为老婆贤惠、小姨温柔，实乃三生有幸，哪能晓得早已经埋下祸根隐患、种下因果了。腥风血雨个凶险，家破人亡个噩运，正无情个等待勒海伊去自投罗网。