离开了家，开始思念梅雨

沪语朗读：徐蔚华

离开了家，开始思念梅雨

来源：上海发布  享读编辑部

作者：安谅

改编：郭莉

朗读：徐蔚华

我从来勿欢喜带伞。嫌比伊麻烦，嫌比伊多余。小辰光去读书，淋雨就是我个保留节目，常庄上演个。衣裳湿透，赛过落汤鸡一只，还要常庄引发感冒。搿能一来大人要骂，同学要笑，我倒还是搿能我行我素，老样子就是勿改勿变。

刚开始工作个辰光，我也勿带伞。落雨勿落雨，我也并勿在乎，你要落就落么，我以勿变应万变，迭个雨落勒头浪向也勿会敲出“大不瘤”来，所以更加当伊无介事。

不过，逐渐逐渐个，我开始想躲过雨水了。

南方个雨，尤其是上海个雨，也真是绵绵密密。梅雨季节，身体老是有湿漉漉个感觉，雨伞也摥勿牢细雨个纷纷扬扬。

有一枪是踏脚踏车上班，雨披裹勒身上，像包粽子恁个，雨帽还禁勿住风个挑拨，歇勿歇个掀（xiao）开来表示想罢工，感觉倒真个是勿适意了。虽然心里还是想抵挡风雨个侵扰，但是头发凌乱了，衣裳湿得淌淌渧，面孔浪也是水迹斑斑，搿副样子实在有损自家个形象。后来有仔车子坐了，葛末也就避开勿少风雨了。

当然，蛮多辰光，还是邪气厌烦搿种突如其来、频频造访个雨水个。模糊了视线，泥泞了道路，辣陌生里头里打湿了衣裳鞋子，还裹带了一阵阵个冷意。雨，终归是忒多了，又迷蒙了天空，曾经有过个诗意，也逐渐淡漠了。

等我到了大西北工作，到了南疆，又工作生活了一年多之后，领略了搿面个干燥缺雨，突然就生发出了另外一种感受。 一年四季，几乎看勿到一场像模像样个雨。上海一天个雨水几乎就是南疆一整年个降雨量了！也见识过伊面个雨滴，搿是一次勒公路上疾驰。还没听到啥动静，就听当地司机讲，看，落雨了！勒伊个指点下，我再发现车窗挡风玻璃浪散落了几滴雨珠。紧接着，又看见几滴雨轻轻叫飘打勒窗玻璃浪，吓丝丝个，像一只只懦弱个小昆虫。后来也看见过雨势稍微强一眼个，密密茫茫个从天而降，但是邪气短暂，飘落个雨，沉没勒虚土里，若有若无，显得孱弱而又委顿。

乃末，我邪气想念上海个雨了。南方家乡个雨，春天，多半是淅淅沥沥个飘洒勒身上，有春天回归，大地回暖个感觉，舔一舔，也有眼微微个甜润。而夏天，雨是经常讲来就来，讲走就走个，晶亮清澈，对炎热一阵鞭打，酷暑多少退却了几分，伊种凉爽清冽是想想也痛快个。

真是勿懂，勒上海屋里个辰光讨厌梅雨，到了远离家乡个地方，却开始想念伊了。假使我现在就能够淋一场家乡个豪雨，我绝对勿会跑跑开躲雨去，就让暴雨从头浇下来，浇出我心里欲望个轮廓，释放出一个游子心里个鲜亮。

图片来自网络