天女（上） / 开普饭

沪语朗读：顾敏

朗读者

天女（上）

选自《新说山海经》

作者：张锦江

沪语改写：丁迪蒙

朗读：顾敏

搿是一位看上去邪气文静、温柔、勿强势个女神。但是呢，因为卷入了一场天帝战争，所以改变了自家个命运。

女神本来勒天浪向过得老好个。伊欢喜种种花、养养草。邪气悠闲个过清雅个生活。勒伊个庭院里向，开勒交关数也数勿清个花。伊欢喜每一朵花，勒花瓣凋落个辰光，一清老早，伊就用伊秀美个小嘴巴去吸小露水，然后用露水涂勒花瓣浪向，搿花瓣有了露水个灵气搭仔伊身浪向个精神、气，花瓣呢，就再也勿会枯萎了，一直是鲜灵灵个，就搿能介，伊拿一爿又一爿个花瓣侪囥勒海。

伊是一个善良、充满爱心个女神，伊常庄勒云端浪眺望大地，每当看到人世间个悲、苦，伊个心愿就印显勒一爿花瓣浪，比方讲，有个小囡生毛病了。伊就从天浪向洒一爿花瓣下来，花瓣浪印显出来个字是：乖囡囡，有只小花鹿来了，侬快点碌起来，去迎接伊呀。小囡个毛病马上就就好了。比方讲，山浪向起火了，山火老旺个。伊就从天浪向洒一爿花瓣下来，花瓣浪有搿能字印显出来：森林搭仔生灵侪需要甘霖个，有一种滋润是神圣个。搿能介，烧得老结棍个山火就自家灭脱了。再比方讲，有只鸟个翅膀受伤，勿可以再勒天浪向飞了。伊就会得从天浪向洒下来一爿花瓣，花瓣浪呢，有搿能字印显出来：对于每一种生灵个落难，爱侪会降临个。搿只受伤鸟个翅膀就好了，可以飞到天浪向去了。

女神有得勿勿少少交关神奇个花瓣，还有邪气善良个爱心。女神个花瓣是用来拯救世界个，勿是用来打仗个。但是呢，黄帝却偏偏要伊去帮忙搭人家打仗。

黄帝是啥人呢？伊是天浪向个大神，炎帝，也是天浪向个大神，大神搭仔大神打起相打来了。

炎帝身边有个大将军，伊个名字叫蚩尤。伊个手下头有得八十一个兄弟，每个兄弟个身高侪有好几丈，伊拉有铜个头、铁个额角头，邪气邪气凶猛、勇敢、力气侪老老大个。

炎帝搭黄帝勒勒冀州搿个地方决战，黄帝派应龙去应战。

应龙是啥人呢？伊曾经帮助过大禹治理水灾，消除妖魔，现在，伊是黄帝手下个大将。应龙个尾巴会得开山、凿岩，嘴巴呢，可以蓄水、吐出叫交关关个水来，引起洪水爆发个。蚩尤敌勿过伊，就请风伯搭仔雨师过来助阵，造成了一场风雨大战，黄帝一看，呒没胜算了，就降旨，叫天女过来帮伊一把。

天女接到命令，只好来了。伊立勒云头里。现在，让阿拉看看伊：细眉秀目，楚楚动人，一头乌发双髻，长长个头发垂飘到了腰间，伊跳起舞来了，两只长长个袖子管里，叫交关关个花瓣像万千只飘舞个蝴蝶倾天而来，花瓣浪印显出来个字是：天神呀，应该用风雨来讲一声善！

狂风暴雨慢慢叫停下来了。黄帝胜利了，蚩尤拨捉牢了，手搭仔脚侪拨戴了枷锁、镣铐。之后呢，黄帝勒黎山拿蚩龙个头个砍下来，枷锁、镣铐侪拨厾勒荒野里，后首来，变成功了一棵枫树，枫树浪向常庄有只四只眼睛个有人个面孔个鸟勒休息，搿就是蚩尤变个。