养蚕宝宝 / 开普饭

沪语朗读：胡运皎

朗读者

养蚕宝宝

作者：鲍国海

沪语改写、诵读：胡运皎

推荐：丁迪蒙

“文革”时期我曾经养过一眼宠物：蚕宝宝、鸡、白头翁、龙虾、小蟹咾啥。现在来讲讲养蚕宝宝。

蚕宝宝是从同学搭仔邻居小囡搿搭要得来个。，伊拉养个蚕蛹勒一年前头破茧成蝶以后产勒白纸头浪，像一粒粒黑芝麻。第二年早春，随牢气温升高，伊拉慢慢叫从虫卵里向爬出来，阿拉用小楷笔个笔毛，拿细小个幼蚕从纸头浪向轻轻叫扫起来，摆勒刚刚摘来个桑叶浪，让伊拉吃桑叶。开始，蚕宝宝邪气小，经过几次褪皮后，就变成了又白又胖。看到伊拉爬勒桑叶浪，用两片像剪刀一样个嘴巴，拼命个吃桑叶，发出沙沙个声响，心理有讲勿出个开心。伊拉排出来个粪便是黑颜色，一节一节个，有股桑叶味道，勿臭。迭是味中药，晒干以后可卖拨中药店个。

养蚕宝宝，离勿开桑叶。我住地方附近有棵桑树，去摘桑叶个人邪气多，低眼个枝条浪老里八早侪拨人家摘脱了，高眼个阿拉够勿着。树边浪个一户人家看见有人来摘，会得哇啦哇啦叫，阿拉吓得只好快点逃。

蚕宝宝个后阶段，伊拉侪是胖乎乎个，马上要开始吐丝结茧了。我从地里向采了一眼茅草，放勒蚕宝宝睏觉个纸盒子里向，让伊拉爬到茅草浪向去。搿个辰光要注意避光了，蚕宝宝勒茅草里向开始从嘴巴里吐出细细个长丝结茧，拿自家封闭勒蚕茧里。开始个辰光，还可以看到伊拉勒茧里向吐丝，摇头晃脑个，长长个身体慢慢叫变短了、变小了。最后呢，伊拉拿自家侪包裹起来，形成一只只白颜色个蚕茧。

大约摸又过了几个礼拜，伊拉就陆陆续续咬破蚕茧，爬出来了，蚕蛹就变成了飞蛾。等到雌雄交配以后，雄蛾就死脱了。雌蛾勒纸头浪向认真个排出了一串串金黄颜色个蚕卵，拿伊个后代留下来以后，也就走完了伊邪气短暂个一生。

养蚕宝宝，让阿拉搿眼青少年体验了一下乡村蚕农个生活，也了解了蚕宝宝个一生，搿些比只勒学堂里个教室里向听老师上课更加有趣，理解也就更加深刻了。