乔家路上乘风凉
沪语讲述：渺渺
作者：丁日青
进入大暑，天气闷热，又到大热天了。
客厅里空调开起来，吃吃茶，看看电视，虽然适意但有些寂寞。不禁想起小辰光勒拉乔家路上乘风凉的景象，真是闹猛。
几十年前的大热天，太阳落山，阿拉就等爹爹落班回来，做啥？迪搿辰光屋里小囝多，经济条件差，吃勿起冷饮，我爹爹落班后就会从厂里带一热水瓶酸梅汤回来。吃好酸梅汤就在天井里汰浴。
汰好浴，我的任务就拿倒勒铅桶里搿汰浴水拎到大门口的马路上浇水，让地面阴凉阴凉。然后搬两只长凳，一块汰衣裳板（大概70*120公分）就在刚刚浇过水的地方搭起一个吃夜饭的台子。迪搿辰光，每家门口侪摆起了各式各样的吃饭台子。小方台，小圆台，最简单的就是两只角牌方凳拼起来就算是饭桌了。
迪搿辰光马路上是没有汽车的，最闹猛搿是大家走来走去“啪嗒啪嗒”木拖板搿声音。五六十年代还没有塑料拖鞋，乘风凉都穿木拖板，隔壁广东阿姨的木拖板最考究，彩色印花小高跟。当然，穿牛皮拖鞋的有铜钱人家是勿会到马路上来乘风凉搿。
大家勒拉马路上乘风凉吃夜饭就像一个露天大食堂，更像是一个夏季家庭菜肴的展示会。侬看，番茄冬瓜汤几乎是家家必备的小菜。我有时会端了饭碗去看看邻居搿夜饭台子上有啥搿好小菜。喔哟，张家搿咸菜头瓣沙；赵家搿黄豆芽油豆腐；孙家搿清炒鳝丝；周家搿红烧猪尾巴；王家搿清蒸臭豆腐……用两张方凳拼起来搿台子上侪是搭老酒搿小菜：一盘油氽果肉（花生米）；一只分成六瓣搿松花皮蛋；还有我最欢喜吃搿两只邵万生醉螃蜞。田老伯伯摇着蒲扇，咪一口黄酒，再嚼嚼醉螃蜞的大钳头，啧啧！愜意得来真象神仙一样。
“来，尝尝阿拉今末子搿西瓜皮炒毛豆，味道交关哉啦。”对门搿宁波阿姆端着一碗小菜叫邻居们尝尝味道。每趟乘风凉吃夜饭邻居们都会把自己认为的特色小菜相互端来端去，用现在时髦的闲话叫“分享”。
夜饭吃好，大人们开始乘风凉谈山海经了。阿拉小囡肯定是坐勿定搿，又侪逃到电线木路灯下面白相了。
有辰光吃好夜饭还会吃西瓜。印象最深的就是排队买西瓜瓤。整只西瓜价钿贵买勿起，小南门郑美琪食品店经常会有西瓜瓤卖搿。迪种西瓜皮厚，西瓜皮专门用来做蜜饯的。挖出来的西瓜瓤比西瓜便宜多了。我记得一角洋钿可以买一钢盅镬子。阿拉屋里虽然小囡多，每人还可以吃到一大碗。迪种西瓜瓤颜色白汰汰搿，一点也不甜，但是我们却吃得很开心。
大热天，下半日侪是太阳，马路上几乎是没有人的，一到夜里乘风凉侪到马路上来了。整条乔家路闹猛得勿得了。大人们侪坐勒有靠背的大小竹椅子上，也有睏勒藤躺椅、竹躺椅上搿。手摇蒲扇，吃吃茶，吹吹牛，嘎嘎讪胡。隔壁陆家条件好点，屋里有只无线电（收音机），经常会传出越剧《楼台会》、沪剧《碧落黄泉》等唱段。门口搿戏迷们眯起眼睛随着曲调摇头晃脑适意的勿得了。
假使迪搿辰光啥人家来个客人，就必须要穿过乘风凉的人群，弄得大家侪晓得。有一天隔壁姚家阿大带了女朋友回来，勿得了（liao）了(le)，乘风凉的邻居们好像夹道欢迎：“噢，迪搿就是阿松搿女朋友，第一趟看见。”“蛮漂亮噢。”“裙子搿小花头蛮灵搿”，“人好像矮小了点”……面对大家搿评头论足，阿松搿女朋友难为情煞了，低了头赶快走进屋里。侬讲，大家侪盯牢侬看，侬吃得消哦？
大概八点多种，路上搿木拖板声音开始少了。“好转来睏觉了！”小鬼（ju）头听到爷娘的叫喊声开始回到自己屋里。有时天实在热，就搭舖板摊了席子睏勒外头天井里。姆妈在阿拉身上搭条床单，怕半夜受凉。然后就在旁边扇着蒲扇帮阿拉赶蚊子。阿拉在姆妈搿阵阵扇风中渐渐进入梦乡……
“起来！起来！落雨了！”有时半夜会被父母叫醒，父母抱起了还在熟睡的弟弟妹妹，我眼睛睁勿开，睏死朦咚勿晓得朝啥地方走了……
一晃几十年了，小辰光在乔家路上乘风凉搿景象历历在目。乔家路就要消失了，还真搿有点怀念。
往期回顾：
传承好自己的方言，语言文化资源就能得到最大程度的保护
農曆廿四節氣詩詞誦讀 立秋——立秋